Nga Klodian Tomorri
1-Qytëtarët shqiptarë paguajnë 14.2 milionë euro në vit për koncesionin e skanimit për të siguruar kufijtë. Se sa të sigurte janë kufijtë e Shqipërisë e tregojnë arkat e bananeve të BanaKingut, që skaneri i nxjerr gjithmonë të pastra.
2-S2 Albania, kompania që ka koncesionin e skanimit zotërohet 51 për qind nga Rapiscan Systems dhe 49 për qind nga shqiptarja ICMS. Vitin e kaluar S2 Albania raportoi 1.2 milionë euro fitim neto pas taksave. Por fitimi real është shumë më i madh se kaq.
3-Çdo vit S2 Albania transferon 3 milionë euro tek kompania ICMS. S2 ja transferon paratë ICMS-se si nën kontraktim për kryerjen e shërbimeve dhe mirëmbajtjen e pikave të skanimit.
4-ICMS ka vetëm 4 punëtorë. Pronarin Olti Pecini, 2 ekonomistë dhe një inxhinier elektrik. Pra me vetëm 4 punëtorë, 3 prej të cilëve s’kanë asnjë lidhje me shërbimin e skanimit, ICMS faturon 3 milionë euro në vit nga S2 Albania për mirëmbajtjen e pikave të skanimit.
5-ICMS nuk ka asnjë qindarkë tjetër të ardhura veç atyre që merr nga S2 Albania. ICMS është krijuar dhe shërben thjesht dhe vetëm për të nxjerrë 3 milionë euro në vit jashtë koncesionit të skanimit. Pompë shkarkuese.
6-Në vitin 2013 ICMS bleu 49 për qind të aksioneve të koncesionit të skanimit, një biznesi me vlerë të paktën 200 milionë dollarë, për vetëm 4 mijë e 500 lekë të vjetra shqiptare. Kontrata e shitjes iu mbajt e fshehtë aksionerëve të Rapiscan (OSI System) në SHBA.
7- Skandali i shitjes u mor vesh dhe shpërtheu në SHBA 4 vjet më vonë, në vitin 2017. OSI është e kuotuar në bursë. Investitorët që kishin tregtuar aksione të kësaj kompanie paditën kompaninë dhe drejtuesit e saj për mashtrim dhe korrupsion të rëndë. Në akuzë thuhej se kontrata e shitjes së 49 për qind të aksioneve të ICMS ishte korrupsion dhe kanalizim rryshfeti.
8-Në SHBA, kompania u përpoq të mbrohej se ICMS kishte kryer investime në koncesion, ndaj shitja nuk ishte për 4 500 lekë të vjetra. Por këto pretendime u rrëzuan edhe në gjykatë, kur ekspertët atje provuan se ICMS nuk kishte asnjë evidencë në bilancet e saj se kishte bërë investime për koncesionin e skanimit.
9-Krimi u certifikua me vendim gjykatë në SHBA. Gjykata tha se drejtuesit e kompanisë OSI, në rastin më të mirë kishin bërë deklarime të gabuara, në rastin më të keq kishin mashtruar qëllimisht.
10-Pas shumë gjyqesh, kompania ra dakord të paguante 12.5 milionë dollarë si dëmshpërblim për investitorët, që të mos vazhdonte me procesi gjyqësore.
Morali? Koncesioni i skanimit është certifikuar si aferë koruptive në SHBA. Vetëm prokurorisë shqiptare nuk i ra asnjëherë ndër mend ta hetojë edhe pse dyshimet këtu janë ulëritëse. Politikisht çështje nuk ngacmohet asnjëherë se janë të gjithë në tavë. Dhe hetimet këtu janë shumë të thjeshta.
1-Çfarë investimesh ka bërë ICMS në koncesionin e skanimit që bleu gjysmën e tij për 450 lekë?
2-Çfarë shërbimesh bën ajo për mirëmbajtjen e pikave të skanimit?
3-Ku shkojnë 3 milionë euro që ICMS arkëton si nënkontraktore nga S2 Albania?
Ndiqeni njëherë paranë se është shumë kollaj.
