Pedagogët i kanë lënë 2 ditë afat kryeministrit Edi Rama për të plotësuar kërkesat e tyre.
Ata kanë thënë se presin deri nesër në orën 16:00 dhe në rast se nuk ka asnjë reagim nga qeveria atëherë ata kanë paralajmëruar përshkallëzim të situatës duke shkuar në grevë urie pa afat.
Pas këtyre deklaratave ka reagur dhe kryeministri Edi Rama me anë të një postimi në Twitter ku shprehet se grevë urie për rritje rrogash bëjnë vetëm njerëz pa fe e pa atdhe.
“Shiksi i NonGratës paska marrë urdhër për t’i dhënë ultimatum qeverisë me grevë urie të pedagogëve! Grevë urie për rritje rrogash bëjnë vetëm njerëz pa fe e pa atdhe, rublaxhinj pa din e pa iman, foltorexhinj e baltaxhinj që vetëm Shqipërisë e shqiptarëve nuk i shërbejnë!”, shkruan Rama.
Deri tani, qeveria ka refuzuar plotësimin e kërkesave duke vendosur rritje me vetëm 15% rritje page, 8% të së cilës ua ngarkon vetë universiteteve.
KERKESAT E PEDAGOGEVE
Rritja e pagave për pedagogët dhe stafin ndihmës
Rritja e financimit për kërkimin shkencor
Rivendosja e shtesave mbi pagë për ‘Dëshmi shëndeti në punë’
Rritja e shtesës mbi pagën për vjetërsinë në punë
Rritja e pagesës së orëve të ngarkesës suplementare
Rivlerësimi i orës mësimore, pasi ka zbritje prej 50% të pagesës së orës mësimore si rezultat i mosdiferencimit të orës mësimore të leksionit.
Rishikimin e tatimit prej 23% mbi pagesën e ngarkesës suplementare
Të pezullohet deri më 2026 zbatimi i pikës c) të paragrafit të 3, i Kreut III të VKM Nr.112, datë 23.2.2018 për kriteret e marrjes së titullit “Profesor”.
Të bëhet transparencë mbi buxhetin dhe të ardhurat e universiteteve publike.
