Shtetet e Bashkuara kanë liruar të burgosurin më të vjetër të Guantanamos, 75-vjeçarin pakistanez Saiffullah Paracha, i cili u mbajt në super burg për gati 20 vjet pa një akuzë të ngritur zyrtarisht.
I dyshuar si simpatizant i Al Kaedës, Paracha u arrestua dy vjet pas 11 shtatorit. Paracha dyshohej se ka gisht në financimin e grupit xhihadist, por ai vetë ka ngulur këmbë se është i pafajshëm.
Lirimin e tij e konfirmoi qeveria pakistaneze.
“Z. Saif Ullah Paracha, një shtetas pakistanez, i cili u mbajt në Gjirin e Guantanamos, është liruar dhe ka arritur në Pakistan të shtunën, 29 tetor 2022,” tha Ministria e Jashtme e Pakistanit.
“Ne jemi të kënaqur që një shtetas pakistanez i ndaluar jashtë vendit më në fund është ribashkuar me familjen e tij”, shtohet në deklaratë.
Paracha u kap në korrik 2003 në Tajlandë pas një operacioni të ashpër nga FBI amerikane.
Paracha, i cili studioi në SHBA, u akuzua nga autoritetet amerikane se kishte kontakte me disa nga figurat më të larta të grupit, duke përfshirë udhëheqësin e tij Osama bin Laden dhe Khalid Sheikh Mohammed.
Pas 14 muajsh në një burg ushtarak amerikan në Bagram, Afganistan, ai u transferua në Guantanamo.
Burgu sekret ushtarak amerikan në Kubë është përdorur për të mbajtur ata që Amerika i përshkruan si luftëtarë të paligjshëm të kapur gjatë “luftës së saj kundër terrorit”.
