Kryeministri Edi Rama ndodhet sot në qarkun e Elbasanit, në të që shihet si një ndezje e motorëve dhe fazë përgatitore për të “zgjuar” elektoratin para zgjedhjeve lokale.
Në një takim me fermerët, pasi ka kritikuar të gjithë armiqtë nga Vladimir Putin e deri tek Sali Berisha dhe s’ka denjuar të mbajë përgjegjësi për inflacionin apo çmimet e larta të karburantit, Rama u ka treguar fermerëve edhe hatër mbetjet që ka me të vetët.
Dhe duket se në listën e atyre që ia kanë prishur qejfin kryeministrit është edhe kryebashkiaku i Tiranës, Erion Veliaj.
Kjo pasi siç Rama tha, ai kërkon nga kryetarët e bashkive të vendit që t’i çojnë investimet përtej rrugëve, duke stimuluar bujqësinë.
“Për pikën frigoriferike, ja ku është. E keni dhe më të mirë se Lali Eri thua ti, unë s’jam i kënaqur as me 1-shin tim dhe dhe as me 1-shin tuj. Pse? Se më ka rënë goja, më ka rënë goja me këta, jeni kryetar bashkie, nuk mjafton më që Bashkia ti japë rrugë, kanalizime, por duhet të futet dhe matanë rrugës. Sa të tjerë mund të vijnë këtu, me ju 30 hajde ulemi tani dhe bëjmë kompani, sa lekë do fusni ju? Sa për të thënë e futëm, 100 mijë lekë të vjetra. Sa duhen? Duhen dhe 70 lekë të vjetra, ku do i gjejmë. Do i shkojmë ministrisë së Bujqësisë, ajo do thotë aplikoni për skemën kombëtare”, tha Rama teksa diskutonte me një fermer.
