Kryetari i Partisë së Lirisë, Ilir Meta ka komentuar bashkimin e votave të deputetëve të Grupit Alibeaj me mazhorancën e drejtuar nga Edi Rama për të votuar mbrëmjen e djeshme në Kuvend, miratimit e projektligjit për hapjen e Dosjeve të ish-Sigurimit dhe verifikimin e më pas përjashtimin nga KQZ të kandidaturave politike me të shkuar komuniste.
Në një konferencë për mediat nga selia e Partisë së Lirisë, Meta tha se Edi Rama u tremb nga nisja e fluturimit të tij në politikë më 25 korrik.
Ai gjithashtu gjeti vendin të bënte ironi me votimin në Kuvend, duke përdorur shprehjen frazeologjike “u mbars mali dhe polli një mi”, si për të treguar mungesën e rëndësisë së këtij projektligji për të.
“Ilir Meta u largua nga Presidenca më 24 korrik dhe iu drejtua popullit me shqiponjë. Shqiponjat fluturojnë të lira dhe Ilir meta në 25 filloi fluturimin e tij. Me çështjen e këtij ligjit që e kanë bërë këta mbrëmë ajo dihet nga të gjithë “u mbars mali dhe polli një mi” thotë populli dhe këtu “mali u mbars në 25 korrik dhe mbrëmë polli një mi” Dhe meqë nuk i dalin ato breshkat, ndoshta e ndihmon miu për të bërë punën e tij”, tha Meta.
Por teksa gazetarët i kujtuan se Edi Rama mbrëmjen e djeshme në Kuvend e tha qartë dhe prerë se “ne këtu në këtë proces na solli shtetasi I.M.”, kreu i PL u përgjigj duke thënë se kryeministri po tenton të shmangë vëmendjen nga vjedhja e 1 miliardë dollarëve të rinj me kontratat e inceneratorëve për 2023.
“Rama kërkon të shmangë vëmendjen nga këto 1 miliardë dollarë të rreja që parashikon për 7 kontrata të reja për vitin që vjen. Këtu janë lekët edhe për pedagogët, studentët, pensionistët dhe rrogat. Kështu ai fryn rrugët, kontratat dhe PP-të në mënyrë që lekët ti marrë me klientët e bandës së tij. E di shumë mirë që është ai shpikësi i e-mail-it dhe ka bërë një autogol që do t’i kushtojë shumë. Partia e Lirisë, ky emër e tmerron dhe ja prish gjumin, e bën të palumtur, sepse mendon se fundi i tij është ai që kërkon t’u bëjë të tjerëve, të cilët ia kanë dhënë këtë mundësi për të bërë diçka të mirë për këtë vend por ai e ka kthyer në pabesi. Autoriteti i Manipulimit, jemi në një proces gjyqësor dhe kjo do të vazhdojë brenda vendit dhe në gjykatën europiane”, nënvizoi Meta.
