Kreu i Partisë së Lirisë, Ilir Meta ka dalë në konferencën e pëjavshme me gazetarët ku është ndaklur tek bojkoti i pedagogëve dhe kërkesa e tyre për rritje të pagës.
“Edhe një herë shpreh solidaritetin e plotë dhe të vendosur të Partisë së Lirisë. I siguroj të gjithë se angazhimi i PL do të jetë arsimi. Si kryeministër dikur, në një situatë të tillë, i kam rritur deri në 58% pagat e pedagogëve. Sot mundësitë janë shumë herë më të mëdha”, shprehet Meta.
Ai tha se qeveria thotë se nuk ka para për rritjen e rrogave të tyre, por shtoi se për vitin e ardhëm, ka parashikuar 7 kontrata me PPP që kapin vlerën e 1 mld dollarëve.
“Ndërkohë që me arrogancë dhe cinizëm i thotë jo pedagogëve se e paska zënë lufta me Putinin, shikoni çfarë bën, projekt buxheti rrit mbështetjen për PPP dhe 7 kontrata me PPP parashikohen për vitin e ardhshëm me vlerë 1 mld dollarë. Shikoni edhe për profesionistët e lirë, do paguajnë 17 mln euro më shumë vitin që vjen, se ky do që të ikin ose të bëhen robër të këtij regjimi”, vazhdon Meta.
Ish-presidenti shtron pyetjen se si ka mundësi që çmimet në Ukrainë janë më të lira se në Shqipëri?
“Ndërkohë e keni vënë re që thotë jemi në luftë me këtë diktatorin. Po si shpjegohet që çmimet në Ukrainë janë më të lira se në Shqipëri. Në Kosovë, Maqedoninë e Veriut, Serbi, Mali i Zi janë shumë më të lira se në Shqipëri?Përkeqësimi i situatës në vend ka vetëm një përgjegjës, ai që qeveris prej 10 vitesh dhe që tani nuk ka më asnjë justifikim”, shprehet Meta.
