Kreu i Partisë së Lirisë Ilir Meta nuk e ka përtypur lehtë qëndrimin pro të deputetëve të grupit Alibeaj dhe Lulzim Bashës në favor të projektligjit për hapjen e dosjeve, teksa bashkuan forcat me mazhorancën e Edi Ramës për të arritur 84 votat e nevojshme për miratim.
Në konferencën për mediat, kreu i PL e ka konsideruar votimin e djeshëm vazhdimi të pazareve të Bashës me Ramën, ndërsa theksoi se ish-kreu i PD ka mbetur peng e historive të së shkuarës me kryeministrin.
“Që nga dorëzimi i pushteti lokal, që nga bojkoti, gjithçka ka qenë një pazar, për ta kthyer jetën politike në pazar, Rama drejton dhe opozitën, ndaj ishte 2 Marsi që i dha një përpjekje të forta, ishte dhe dekreti i 6 Marsit, që tregoi se kush ishte opozita. Të gjithë duhet të distancohen, nuk na duhet një opozitë që i shërben një axhende hajdutërie”, tha Meta.
I pyetur nëse ishte “hakmarrje e Bashës bashkimi i votave”, Meta u përgjigj duke thënë se “Basha nuk ka më fuqi për të bërë asnjë hakmarrje, se ç’kishte për të bërë ai e ka bërë”.
Sa i përket deputetëve që qëndrojnë në krah të Alibeajt dhe pas të cilëve gjasat janë që të fshihet ish-kryetari Basha, Meta tha se “kemi të bëjmë me deputet që nuk kanë më çfarë të humbasin, elektorat, dinjitet, moral besë nuk kanë”.
Ai madje tha se ata janë paguar për të votuar projektligjin duke i akuzuar se janë opozitarët më të pasur.
“Nuk kanë më çfarë të bëjnë më shumë se sa kanë bërë dhe kjo loja e historisë me I.M. është lojë Rama-Basha. Nuk ka fuqi Basha për të kryer asnjë lloj hakmarrje, Basha do përpiqet të prishë punë sa të mundet. Ai është peng i historive të veta. Ata deputetët marrin lekë dhe s’duan fare as politikë aty. Shikoni llogaritë e familjarëve si i kanë pasur para se të ishin në opozitë dhe si i kanë sot. Opozitarë më të suksesshëm në biznese nuk ka parë historia botërore”, deklaroi kreu i PL.
