Nga Klodian Tomorri
Bën tender Redjan Krali për pastrimin e Kavajës dhe Luzit me vlerë limit 5 miliardë e gjysmë lekë të vjetra ose 4 milionë e 700 mijë euro. Në tender paraqiten dy oferta. Njëra me vlerë 4.3 miliardë lekë nga Corsel, tjetra me vlerë 5.5 miliardë lekë nga Alko Impex.
Ashtu siç e do zakoni, oferta me vlerë më të vogël skualifikohet gjithmonë se për dreq nuk i plotëson asnjeherë kriteret. Këtë herë kjo kompania me ofertën më të vogël nuk paska patur doktor dhe kishte 3 punonjës më pak nga sa e gjykonte të arsyeshme zoti Krali se duhet të kishte.
Pra, fluturoi oferta e vogël. E skualifikuan. Tenderin e fitoi Alko me 99.8 për qind të fondit limit. 1 miliardë e 200 milionë lekë ose 1 milionë euro më shtrenjtë se oferta tjetër që skualifikuan.
Alko është në pronësi të Arber Abazit. Sa herë që merr tender kjo kompani, opozita, mediat, të gjithë ja veshin Sadri Abazit. Por Sadriu nuk ka asnjë lidhje me këtë kompani. Lidhjet e Alkos janë te tjera. Njëra është në kupolën e Ministrisë së Infrastrukturës. Tjetra është në kupolën e grupit parlamentar të Partisë Socialiste. Ndaj Sadriu i ankohej Ramës se pse merrte tendera Alko, sepse namin ja vishnin atij, kur të mirat shkonin në tjetër vend.
Gjithsesi, pas vitit 2018 Alko u shndërrua në një nga lojtarët më të mëdhenj të tenderave publike në Shqipëri. Vetëm nga ARRSH, në tre vitet e fundit, ka marrë 55 miliardë leke kontrata mirëmbajtje rrugësh. Këto kontrata luhen në trekëndeshin MIE-ARRSH-ALKO.
Përtej kësaj, ka dhe 30 miliardë lekë të tjera për pastrimin nga Bashkitë e socialistëve kudo nëpër Shqiperi. Këtu trendekeshi i influencës është Grupi Parlamentar- Bashki- Alko.
Pra 80 miliardë drejtepërdrejtë. Pa përfshirë tenderat e marrë në bashkëpunim me kompani të tjera. Aty shuma kërcen mbi 100 milionë euro.
Ndaj shtrëngojini mirë rripat, nuk ka rritje rrogash. Nuk ka para buxheti për rroga dhe pensione sepse paratë na duhen per t’i sistemuar nëpër tendera me miq, shokë dhe familjarë.
