Kryetari i Partisë Demokratike Sali Berisha, në takimin e kryetarët e degëve Tiranë, prezantoi dy pikat e rendit të ditës, që sipas tij janë, themelore.
“Primare dhe protesta, protesta dhe primare”, theksoi Berisha.
Primaret
“Sot dy janë çështjet më themelore të PD-së për veten dhe Shqipërinë, primaret dhe protestat. Unë kam bindjen se nga mëngjesi deri në darkë, shumica e atyre që ju takoni u pyesin se ku i keni protestat, pse nuk ka, pse i shtytë protestat dhe ata kanë shumë të drejtë. Nga ana tjetër ne vijmë si një forcë politike që kemi premtuar ndryshimin dhe konkretizojmë në këtë periudhë një hop të madh cilësor në ndryshim, është zbatimi i primareve në zgjedhjen e qytetarëve të parë dhe këshilltarëve, në mënyrë që zotimin para shtetasve tanë dhe shqiptarëve ta shndërrojmë në realitet, me gjithë vështirësitë, por me bindjen më të thellë se ky është një zhvillim jashtëzakonisht i rëndësishëm për të sotmen dhe të ardhmen e Shqipërisë. Në këtë vend, vota u përjashtua nga partitë dhe nga shoqëria, prandaj rikthimi i saj është vendimtar për të ardhmen tonë dhe të Shqipërisë. Për një gjë ndihemi të lehtësuar”, tha Berisha.
“Kjo parti nga dhjetori deri më sot ka votuar më shumë se kurrë dhe kemi bërë shumë mirë dhe prap nuk do të rreshtim përpjekjet për të konsoliduar votën e lirë, si shprehja e vullnetit të anëtarëve dhe mbështetësve tanë. Kryesia ka diskutuar gjerësisht për rregulloren e primareve. Tani përgjegjësia kryesore shkon tek seksionet dhe ky është zhvillimi tjetër i besimit që ne tregojmë për kryetarët e seksioneve, sekretarët. Atyre, seksioni i organizimit do të ju ndajë listat, do të jenë me dokumente zyrtare, mbi të cilat seksionet do të përcaktojnë simpatizantët dhe janë të mirëpritur të votojnë”, shtoi ai.
“Në këto primare ne jemi të hapur për çdo anëtar apo simpatizant të PD të kandidojë dhe cilido që mendon se këto janë vetëm për anëtarët, ju them që janë edhe për simpatizantët. Ata janë të lirë të vijnë të votojnë bashkë me anëtarësinë tonë. Ne nuk ofrojmë një diçka të themi të kontrolluar nga kryetari i degës, por një praktikë të vërtetë që cilido që do të provohet është i mirëpritur. Duhet të bëjmë gjithçka që ky proces të jetë i suksesshëm. Kam besim në përgjegjësinë, përkushtimin tuaj se ju bashkë me anëtarët e kryesive, të seksioneve dhe grupseksioneve do t’i shndërrojnë primaret në një histori suksesi. Është bërë një lloj axhende, kalendari dhe në bazë të tij do të ecet. Tiranën, Durrësin dhe Elbasanin do të përpiqemi ta përshpejtojmë dhe me të tjerat, dora dorës”, tha më tej Berisha.
Protestat
Berisha akuzoi kreun e qeverisë për vjedhje të qytetarëve dhe paralajmëroi për protesta masive. Ai tha se duhet të tregohen kreativë.
“Opozita duhet të bllokojë porte, aeroporte, do ulet çmimi i naftës, s’mund të kthehet nafta në kamxhik për qytetarët”, tha Berisha, i cili shtoi se përgjegjës për çmimin e kripur janë taksat e vendosura nga qeveria mbi naftën.
Berisha mbështeti dhe kërkesat e pedagogëve për rritjen e pagave.
“Vetëm një shofer në Fondin Shqiptar të Zhvillimit merr 4-fishin e pagës së një lektori. Në Kosovë, pedagogët paguhen dy herë më shumë se në Shqipëri”, u shpreh ai.
Berisha preku edhe çështjen e emigrimit masiv të shqiptarëve, duke bërë përgjegjës qeverinë.
Ai paralajmëroi Ramën të mos prekë votën, duke u shprehur se “do i japim dhe përgjigjen më ekzemplare”
“Nëse s’do kthejmë votën do shpërbehemi si komb, por s’kemi pse shpërbehemi. Ne e duam këtë vend të bekuar. Një grup hajdutësh që vjedhin nga mëngjesi në darkë dhe varfërojnë shqiptarësh, duhet ti përzëmë”, shtoi ai.
“Kjo është një protestë për të shpëtuar Shqipërinë“, theksoi kreu i PD-së.
“Ne s’pajtohemi më shpërbërjen e vendit, varfërimin, shndërrimin e Shqipërisë në një shtet mafioz dhe droge, unë kam besim të madh tek ju, tek anëtarësia e PD-së, Tirana është ajo që ka detyrën kryesore”, tha Berisha.
