Kryetari i Partisë Demokratike, Sali Berisha ka folur për fjalimin e kryeministrit Edi Rama në Strasburg në lidhje me rishikimin e raportit të Dick Marty. Berisha tha se kryeministri Rama i futi thikën Kosovës, sepse në momentin më të papërshtatshëm, kur Kosova kishte nevojë për lobim pozitiv për anëtarësim në Këshillin e Evropës, kryeministri lëshoi lumë sharjesh dhe akuzash.
Kryeministri ka reaguar pas deklaratave të Berishës. Rama ka bërë një postim ironizues ndaj kreut të PL-së Ilir Meta, kreut të PD-së Sali Berisha dhe Lulzim Bashës.
Në një postim në Twitter, Rama thumbon opozitën, duke e cilësuar atë si opozitën e rublave. Rama shkruan se opozita ishte akoma më shumë e përfshirë në financimet ruse dhe se gjatë vitit 2011 votuan rezolutën që miratonte raportin e Dick Marty-t.
Postimi i Ramës ne Twitter:
“Rublat vazhdojnë të flasin mbrapsht në Tiranë, siç folën në 2011 përmes votës KUNDËR Kosovës, e vetë Shqipërisë dhe PRO Rezolutës famëkeqe, që lemerisi botën me shkulësit e organeve shqiptarë! Opozita e rublave është e zhytur shumë më thellë se sa duket në thesin e parave ruse…”
