Vështirësia ekonomike dhe rritja e paprecedent e çmimeve kanë detyruar qytetarët në Elbasan të reagojnë duke i kërkuar “llogari” qeverisë shqiptare dhe kryeministrit Edi Rama për keqmenaxhimin e krizës.
“Boll heshtëm” ka qenë motoja e protestës që po mbahet sot në qytetin e Elbasanit, duke marrë shkasë nga çmimet e larta të karburanteve ku sot një litër naftë kushton 245 lekë. Qytetarët kanë thënë se kanë dalë në shesh për të protestuar, duke shtuar se familjet shqiptare po varfërohen çdo ditë dhe më shumë.
“Unë protestoj për të drejtën time për të qenë njëri. Si komb kemi humbur personalitetin tonë, duke pranuar gënjeshtra, mashtrime që na bën kjo qeveri. Kam besim të madh se shumë demokratë që nuk vijnë këtu por te kutia do e tregojnë vetën. Të gjithë janë në një hall. Bordi është monopol”- tha një qytetar.
“Protesta është shumë e drejtë, ne përpara jemi si qytetar se sa si përfaqësues i forcave politike, është një kauzë përtej ngjyrimeve politike. Një pjese e mirë e njerëzve janë në punë. Nuk dihet të mohojmë edhe presionin nga autoritetet që nuk duan t’i shohin në shesh. Ky është vetëm fillimi, do të vijojmë. Po paguajmë çmimet më të larta në Europë, ndërkohe jemi më të varfrit”– tha një tjetër.
Qytetarët i janë përgjigjur pozitivisht ftesës së Partisë Demokratike për të protestuar në sheshin “Gensher”, kurse dhjetëra shoferë kanë fikur makinat e tyre në rreth rrotullimin e 1 majit.
Gjithashtu kësaj proteste i janë bashkuar edhe pensionistët të cilët kanë shprehur indinjatën e tyre duke pohuar se qeveria i ka lënë në “mëshirë të fatit”. Të moshuarit pohojnë se ndihma e qeverisë është qesharake krahasuar me rritjen e paprecedent të çmimeve dhe inflacionin në vend.
“Nëse qeveria s’na ofron mirëqenie, të largohet”, është shprehur një pensionist.
Bulevardi është bllokuar nga protesta, kurse qytetarët kanë shprehur revoltën e tyre jo vetëm për çmimin e karburanteve, por edhe për krizën e rëndë ku janë zhytur.
Nënkryetari i PD, Luçiano Boçi ka folur për mediat nga protesta e organizuar në Elbasan ditën e sotme, ndërsa deklaroi se arsyeja e këtij tubimi nuk është vetëm rritja e çmimit të naftës por edhe rritja e pasigurisë në vend dhe shpopullimit. Boçi tha se rritja e çmimit të naftës nuk është vetëm abuzim, por është vjedhje e hapur, ndërsa shtoi se qeverisë i duhen paratë pasi ka përpara një fushatë zgjedhore dhe i nevojiten miliona euro për të blerë vota dhe për të organizuar fushatën.
“Arsyet janë të ditura, nuk është vetëm rritja e naftës, është rritur pasiguria e shpopullimi. Të parët sot janë qytetarët e Elbasanit, janë të revoltuar ndaj padrejtësisë. Nuk është vetëm abuzim, por është vjedhje e hapur rritja e çmimit të naftës. Shihet qartë që qeveria ka nevojë për para abuzive, ua rrëmben qytetarëve përmes këtyre formave siç është rritja e karburanteve që depoziton miliona euro në arkën e shtetit nëpërmjet TVSH-së. Nuk ka ndihma për pensionistët e studentët dhe ka çmimet më të larta të karburanteve. Jo vetëm në raport me pagën, por çmimi është më i larti në rajon. Kur shikon që çmimet në bursë bien ,dhe në vend ngrihen rritet revolta. Ka një fushatë zgjedhore përpara dhe i duhen miliona euro për të blerë vota dhe për të organizuar fushatat. I bëj thirrje qytetarëve të na bashkohen pasi nuk ka më kohë për të humbur, kjo revoltë është e domosdoshme. Jemi të gatshëm si PD të jemi pranë qytetarëve, t’i mbrojmë ndaj abuzimeve jo vetëm ekonomike por edhe policore. Sot ishim dëshmitarë të bllokimit të aksit kryesor nga policia që të duket sikur protesta të mos kishte funksionuar”, u shpreh Luçiano Boçi.
Gjithashtu edhe kreu i degës së PD-së Elbasan, Bledi Himçi foli për protestën së zhvilluar në këtë qytet për rritjen e çmimeve tha se qytetarët janë të pambështetur. Himçi u shpreh se qytetarët kanë dalë në protestë pasi janë të revoltuar nga rritja e papërballueshme e çmimeve.
“Situata ekonomike ka bërë që të thirret kjo protestë. Situata po degradon nga dita në ditë, dhe në mënyrë masive të rinjtë janë larguar. Elbasani sot ndërllogaritet me largimet më të mëdha. Rritja e çmimeve është e papërballueshme për qytetarët. Situata është në kolaps. Tek njerëzit shihet një depresion që ka shkaktuar largimin dhe ka sjellë një shkallë pakënaqësie të lartë tek qytetarët në Elbasan”, tha Himçi.
Kujtojmë që kreu i Partisë Demokratike, Sali Berisha ditën e sotme ka intensifikuar aksionin opozitar për t’i kërkuar llogari mbi keqqeverisjen dhe abuzimet me paratë e shqiptarëve, kryeministrit Edi Rama.
