Në Elbasan është duke u zhvilluar protesta e parë e thirrur nga Partia Demokratike për rritjen e çmimeve të ushqimeve e karburantit, dhe krizën ekonomike.
Opozita po punon që të kanalizojë revoltën qytetare kundër qeverisë Rama në kushtet kur qytetarët përballen çdo ditë me inflacionin në rritje dhe të shumtë kanë qenë ata që i janë bashkuar thirrjes për të dalë në shesh.
Qytetarët kanë fikur automjetet e tyre në formë thirrje për qeverinë që të ndalë abuzimin e Bordit të Transparencës, i cili në vendimin e fundit realizoi një rritje skandaloze me më shumë se 20 lekë për çmimin e naftës.
Sakaq, qytetarëve nuk ju del inati as me ministren e Infrastrukturës dhe Energjisë, Belinda Balluku, duke qenë se thirrjet e saj për kursim energjie, shpeshherë janë dukur qesharake dhe tallëse për popullin në një kohë që qeveria alokon tenderë me shifra marramendëse për shpenzime luksi.
Një zonjë nga Elbasani teksa fliste për mediat nga protesta, u shpreh e revoltuar me “këshillën” e Ballukut, për të kursyer energji duke larë rrobat me 30 gradë në lavatriçe.
“Po kur thotë ajo zonja lani rrobat me 30 gradë. Po zonja i hedh se nuk blen rroba, i blen të shtrenjta 3000 euro një xhaketë kurse ne nuk blejmë dot një pale të brendshme. Është bërë shumë e vështirë. Nuk mban më ujë pilafi. Boll më me këtë! Nuk e durojmë dot më!“, tha qytetarja për Ora News.
