Grabitjet nga shqiptarët në Itali nuk janë një vepër kriminale e panjohur. Por këtë herë “skifterët” duket se kanë zgjedhur njeriun e gabuar për të bërë goditjen, pasi kanë hyrë për të grabitur në vilën e yjeve të Juventusit, Angel Di Maria dhe Dushan Vlaholic.
Teksa ishin në banesë, grabitësit kanë kuptuar se policia kishte mbërritur në vendngjarje, ndaj kanë tentuar t’i mbathin duke kaluar murin, ndërsa shoferi i cili i priste jashtë në tentativë për tu larguar tentoi të shtypte një nga karabinierët.
Oficeri i policisë italiane i gjendur në pozitë të vështirë është detyruar të qëllojë në ajër. Sipas Corriere Della Serra në pranga ka rënë një 31-vjeçar shqiptar, i identifikuar si David Zira.
“Skifteri” shqiptar rezulton të jetë një person me precedentë të mëparshëm kriminal në fushën e grabitjeve. Së bashku me grupin e tij që përbëhej edhe nga tre persona të tjerë, të cilët arritën t’ia mbathnin nga Policia, Zira kishte disa ditë që mbahej nën vëzhgim.
31-vjeçari ishte i shpallur në kërkim pasi ndaj tij Gjykata e Padovas dhe e Venecias kishin lëshuar urdhë-arreste.
Plani i grabitjes
Shqiptari së bashku me anëtarët e tjerë të bandës për të cilët policia dyshon se janë po ashtu shqiptar kishin bërë një plan të organizuar deri në detaj se si do të hynin brenda dhe më pas të mund të largoheshin. Ata mbërritën në Costa Alberto Riço me një “Alfa Romeo” që dyshohet të jetë e vjedhur dhe me targa të falsifikuara. Njëri nga anëtarët e grupit qëndroi në makinë ndërsa tre të tjerët u ngjitën në shtëpinë e yjeve të Juventusit.
Diçka duket se nuk ka shkuar sipas planit. Rojat private që ruajnë vilën kanë pikasur diçka të dyshimtë dhe menjëherë kanë dhënë alarmin në qendrën operative dhe forcat e Policisë u vunë në alarm dhe mbërritën në pak se katër minuta.
Ata ishin duke pritur mbërritjen e Di Marias po në fakt u erdhi policia. Me të pikasur Policinë shqiptarët nxituan t’ia mbathnin duke kaluar murin ndërsa shoferi i cili qëndronte në pritje tek makina në tentativë për tu larguar tentoi të shtypte dhe një oficer të policisë, i cili i gjendur në atë situatë u detyrua të qëllojë në ajër. Tre arritën t’ia mbathnin ndërsa 31-vjeçari në tentativë për tu larguar u kap pak metra më larg.
Kontrolli i makinës
Pas arrestimit të shqiptarit policia sekuestroi dhe makinën e përdorur në grabitje brenda së cilës u gjetën çanta, radio marrës, dy celularë, brava dyersh por dhe një armë që dyshohet t’i ketë rënë shoferit nga nxitimi për t’ia mbathur. Dyshimet e Policisë janë se grupi i “skifterëve” ka kryer edhe grabitje të tjera në zonë gjatë javëve të fundit. Policia italiane ka dyshime se ata janë një grup profesionistësh dhe kanë nisur kontrollimin e të gjitha kamerave të sigurisë në zonë për të bërë të mundur identifikimin dhe kapjen e tre të arratisurve.
