Kryetari i Partisë Demokratike, Sali Berisha foli për takimin me kreun e Partisë së Lirisë Ilir Meta me ambasadoren amerikane Yuri Kim.
Gjatë bisedës me gazetarët, Berisha tha se nuk është aspak i shqetësuar nga ky takim dhe se sheh si diçka pozitive.
“Është e trishtë të konstatosh qëndrimin e guvernatores ndaj votës. Votën duhet ta respektosh. Por të pretendosh se po respekton shtetin ligjor, duke mos respektuar votën, është absurde. Nëna e shtetit ligjor është vota, pa votë nuk ka shtet ligjor, ka diktaturë, ka autokraci, ka çdo formë tjetër, por jo demokraci. Se si ka mundësi këto, mendoj se nuk dëmtojnë PD-në dhe Sali Berishën, por janë totalisht në kundërshtim këto ndërhyrje me Konventën e Vjenës dhe përpjekjet e PD-së me marrëdhënie të mira dhe shumë të mira me SHBA.
Çfarë e shtyn zonjën të mohojë? Ku e gjen autoritetin, mbi ç’bazë, mbi ç’konventë, mbi ç’marrëveshje, të mohojë votën e 11 dhjetorit, votën e 6 marsit, 22 majit? Nëse ka një parti që ka votuar më shumë në Europë se kjo parti, nuk ka. Atëherë kemi të bëjmë me një çështje themelore. Unë e kam parë kur vrapoi të elozhojë votën e transfiguruar nga patronazhistët, nga blerjet, etj. Po njeriu në një moment duhet t’i thotë vetes: Enough is enough”, tha Berisha.
Pyetje: Nëse ambasadorja kërkon ndjesë a jeni i gatshëm për tu takuar?
Berisha: Nuk ka pasur përpjekje, por ndjesa në Kodin moral pranohet. Njeriu u qytetëruar pranon ndjesë. Ti thuash një populli demokrat , të marrësh nga vepra te Enver Hoxhës është e palejueshme për një diplomate, por zgjedhjet janë të saj.
Pyetje: A ju ka shqetësuar takimi i Metës me ambasadoren Kim?
Berisha: Unë e kam mirëpritur takimin, nuk ka pse të më shqetësojë, e quaj shumë normal dhe Ilir Meta është ish-president., kryetar i një partie dhe gjëja më normale është takimi. E vlerësoj është pozitiv.
Kujtojmë që ditën e djeshme në një intervistë për mediat, Yuri Kim deklaroi se Uashingtoni nuk e lejon që të takojë persona të shpallur “Non Grata” për korrupsion dhe minim të demokracisë. Berisha theksoi se PD mbetet e vendosur për të zhvilluar marrëdhënie shumë të mira dhe miqësore me SHBA. Sipas tij SHBA është aksioneri kryesor i sigurisë së botës së lirë dhe opozita beson se duhet të japë çdo kontribut të nevojshëm që ky funksion të përmbushet në funksion të vendit dhe paqes në botë.
