Pas dëshmisë së Deizi Arapit për djegjen e makinës gjatë natës së djeshme, për një konflikt të pretenduar me deputetin Bledjon Nallbati, ka reaguar ky i fundit.
Nallbati në një prononcim nga Gjermania shprehet se ka pasur vetëm një konflikt verbal kur ishte kryebashkiak dhe vijon duke thënë se ajo është nxitur nga dikush tjetër për ti bërë këto akuza.
Deputeti, po ashtu ka deklaruar se do të bëjë kallëzim për shpifje ndaj 27-vjeçares.
“Jam i habitur nga këto akuza. Unë kam pasur vetëm një konflikt verbal kur isha kryebashkiak, por asgjë më tepër. Besoj se është nxitur nga dikush tjetër për të bërë këto akuza. Sa i përket punëtorit tim nuk mbaj përgjegjësi për çdo punëtor që kam, me kë zihen dhe çfarë bëjnë. Sapo të kthehem nga Gjermani do të bëj një kallëzim për shpifje”, ka thënë Nallbati.
Arapi në dëshminë e saj ka thënë se katër vite më parë mamaja e saj është pushuar nga puna si pastruese padrejtësisht dhe se është konfliktuar me ish kryebashkiakun Bledion Nallbati. Pas konfliktit ju dogj makina e parë.
“Dje gjatë gjithë ditës më ka ndjekur një person me të cilin dhe kam shkëmbyer fjalë mbrëmë. Ai është punonjës i karburantit në pronësi të Bledion Nallbatit. Në vendngjarje është gjetur një bidon benzine nga ky karburant ashtu si herën e kaluar. djegien e makines së parë policia e konsideroi aksidentale por ja qe ngjarja po përsëritet. Nëse nuk merren masa nuk është cudi që unë të përfundoj në ndonjë kanal”, ka deklaruar ajo në polici.
