Sekretari i Përgjithshëm i Partisë së Lirisë, Tedi Blushi ka reaguar për atentatin mafioz e ndodhur dy ditë më parë në Shkodër mbeti i vrarë 19-vjeçari Erjon Xhenje.
Gjatë një statusi në rrjetet sociale, Blushi bën përgjegjës qeverinë e cila sipas tij po i jep mbështetje bandave ndërsa Shkodra është nën terrorin dhe pushtetin e krimit. Blushi shprehet se siguria e qytetarëve dhe e bizneseve në këtë qytet është tronditur më rëndë se kurrë, ndërsa kujton 6 vrasjet e bujshme që tronditën kryeqendrën e veriut në 9 muaj.
Reagimi i plotë i Tedi Blushit:
“Shkodra nën terrorin dhe pushtetin e krimit dhe të bandave me mbështetje qeveritare! Siguria e qytetarëve dhe e bizneseve në Shkodër është tronditur më rëndë se kurrë.
Kryeqendra e Veriut, ndodhet nën pushtetin e krimit për shkak të mbështetjes së hapur të Qeverisë për bandat më të rrezikshme lokale, të mbrojtura dhe të vëna në shërbim të saj.
Vetëm në 9 muajt të parë të vitit 2022 në Shkodër janë ekzekutuar 6 persona. Të gjitha vrasje mafioze të pazbardhura nga Policia e Shtetit dhe ende pa autor.
Çdo qytetar në Shkodër i di shumë qartë motivet e krimeve, edhe Policia e Shtetit i di, por nuk bën asnjë përpjekje për të zbardhur vrasjet, arrestuar dhe nxjerrë para drejtësisë autorët, sepse direktiva që ka marrë nga Edi Rama dhe Bledi Çuçi është e qartë: “Hëngshin kokat e njëri-tjetrit. Pa krim nuk ka zhvillim”.
Duke dënuar me ashpërsinë më të madhe lënien e Shkodrës nën sundimin e bandave të lidhura me pushtetin, i bëjmë thirrje Policisë së Shtetit, në zbatim të ligjit dhe të Kushtetutës, të nisë pa vonesë rivendosjen e rendit publik dhe sigurisë së jetës në këtë qytet simbol të qytetarisë, dijes, arsimit dhe kulturës.
Shqiptarët meritojnë një Qeveri dhe Polici të Shtetit që lufton me zero kompromis krimin e organizuar në çdo qelizë të saj.
Partia e Lirisë garanton çdo qytetar shqiptar se që në ditën e saj të parë në pushtet do të nisë me vendosmëri të hekurt betejën për të çmontuar dhe shtypur me të gjithë forcën e ligjit bandat kriminale të Edi Ramës në çdo qytet të Shqipërisë”
