Prindërit e nxënësve të shkollës 9-vjeçare “Naim Frashëri” në Fier, kanë dalë në protestë ditën e sotme pasi kundërshtojnë vendimin e Zyrës Arsimore, për rikthimin e shkollës me turne.
150 nxënës, të ndarë në 2 klasa të katërta dhe 3 të pesta, janë përcaktuar të ndjekur procesin mësimor pasdite, ndërkohë që prindërit thonë se ky vendim I ka gjetur të papërgatitur.
“Fëmijët janë njoftuar dy ditë para shkolle.Nuk jemi të informuar fare për këtë gjendje. Kërkuam zgjidhje të drejtoresha, na tha nuk ka asnjë mundësi për zgjidhje. Kemi dy ditë që i mbajmë fëmijët pa shkollë në shtëpi.”
Shqetësimin thonë se e kanë çuar edhe në bashkinë e drejtuar nga Armando Subashi.
Në vend të zgjidhjes, thonë se kanë marrë një porosi që të kthen pas në kohë.
“Na përcolli.Na tha varini çelësat fëmijës në qafë dhe çojini në shkollë se kështu e kemi bërë dhe ne në vitet atëherë. I thashë nuk janë të njëjtat kushte. Nuk mund ti var një fëmije 9 vjeç çelësin në qafë dhe ta lë në shtëpi vetëm sepse unë jam në punë, iki në orën 8 dhe vi në orën 4.”
Mësimi me turne dhe vonesa për rikonstruksionin e godinës, nxori në protestë edhe prindër të nxënësve të shkollës “Jusuf Hoti” në Durrës.
