Hakerat të cilët sulmojnë Shqipërinë kanë aritur të hyjnë në sistemin e survejimit me kamera sigurie.
Përmes faqes “HomelandJustice”, hakerat kanë publikuar një video 6 minuta të gjatë ku shfaqet sistemi SMART PSS, i kontrollit qendror i të gjitha pikave të kalimit kufitar në RSH.
Në video tregohet filmimi që përcjell kamera e sigurisë në hyrjen numër tre në aeroportin Nënë Tereza, ku shfaqet një punonjës i policisë kufitare përballë sistemit TIMS dhe qytetarë që presin tu kontrollohet pasaporta.
Ora kur hakerat e Iranit janë futur në sistemin e kamerave është 20:04 e ditës së djeshme.
Autoritetet kanë bërë përgjegjëse Iranin edhe për këtë sulm kibernetik që vjen pas atij të 15 Korrikut. Ndërkohë, hakerimi ndaj sistemeve të policisë ka sjellë kaos në pikat kufitare. Ekziston frika se haekrat mund të kenë shtënë në dorë informacione sekrete të policisë shqiptare.
Fillimisht, ishte kryeministri Edi Rama i cili konfirmoi sulmin ndaj “sistemit TIMS” dhe bëri përgjegjës Iranin.
Më pas, ministria e Brendshme njoftoi se “mbrëmjen e kaluar sistemet e ruajtjes dhe transmetimit të të dhënave në Policinë e Shtetit janë gjendur nën një sulm kibernetik të ngjashëm me atë që pësoi e-Albania në muajin korrik”.
“Nga të dhënat paraprake rezulton që sulmi të jetë kryer nga e njëjta dorë. Ekspertët tanë bashkë me ata të vendeve tona partnere kanë punuar intensivisht prej momentit të parë kur është detektuar sulmi, për të garantuar së pari pacënueshmërinë e të dhënave dhe më pas neutralizimin e këtij akti kriminal. Për efekt sigurie sistemet tona, përfshi atë TIMS, kanë qëndruar përkohësisht të mbyllura derisa rreziku të shmangej plotësisht. Shumë shpejt sistemi TIMS do të rikthehet në punë. Maksimalisht të vendosur, bashkë me aleatët tanë, vazhdojmë punën për të bërë gjithçka duhet që sistemet tona digjitale të jenë të sigurta dhe shërbimi ndaj qytetarëve të mos ndërpritet në asnjë rast”, thuhet më tej në njoftim.
