Sulmi kibernetik ndaj faqeve shtetërore, i dyti në pak javë, ka marrë përmasa shqetësuese, duke vënë në alarm kupolën e Policisë. Në rrezik janë të dhëna sekrete të forcave të sigurisë.
Në Kakavijë dhe Kapshticë, po punohet me regjistra me dorë për regjistrimin e hyrje daljeve nga kjo pikë kufitare, pasi sistemi TIMS është jashtë funksionit prej orësh. Kryeministri Edi Rama, përmes një njoftim në Twitter, konfirmoi se Irani ka kryer një sulm kibernetik ndaj sistemit.
“Një tjetër sulm kibernetik nga të njëjtët agresorë, tanimë të ekspozuar dhe dënuar prej vendeve aleate e mike të Shqipërisë, është shënuar mbrëmë mbi sistemin TIMS! Ndërkohë vazhdojmë punojmë përditë pa orar me aleatët për t’i bërë të papenetrueshme sistemet tona digjitale”, shkroi ai në Twitter.
Por, burime policore bënë me dije se sulmi është shqetësues dhe ka prekur më shumë se sistemin TIM. Sipas të njëjtave burime, janë sulmuar serverat e Policisë, duke bllokuar gjithë sistemet online me të cilat operojnë në punën e përditshme forcat e sigurisë.
Në to ka të dhëna sensitive për persona me rrezikshmëri të lartë shoqërore, si edhe operacione të ndryshme, përfshirë edhe informacione të klasifikuara sekret, që rrezikojnë të bien në dorën e hakerave.
“Offline” është edhe faqja zyrtare e Policisë së Shtetit.
