Hakerimi i sistemit të Policisë ka sjellë probleme në pikat e kalimit kufitar të vendit, ku pasagjerët kanë mbetur të bllokuar në pamundësi për të kryer udhëtimet e planifikuara.
Në areoportin “Nënë Tereza” në Rinas, raportohet se mijëra pasagjerë po presin në radhë për të kaluar, por lëvizja është bllokuar për shkak të rënies të sistemit të rregjistrimit të hyrje-daljeve nga vendi, i njohur si sistemi TIMS.
“S’po e kuptojmë, kemi që në 11 që po presim, na kanë thënë që do prisni”, u shpreh një qytetar për mediat nga aeroporti. “Nuk dimë gjë, kemi 2 orë që po presim, nuk na kanë thënë asgjë”, tha një tjetër. “Kemi 4 orë që po presim, s’na kanë dhënë asnjë lloj përgjigje, dhe presim akoma”, ishte një tjetër dëshmi.
Një situatë e ngjashme është krijuar edhe në Portin e Vlorës. “Kam që në orën 10, pres biletën, paguaj lekë për tu torturuar këtu. Dhe nuk vij më në Shqipëri. U betova, do hedh pasaportën. Është torturë, në vapë”, tha një qytetar.
Probleme janë shfaqur që mbrëmë edhe në Portin e Durrësit, por nuk është pezulluar puna, për shkak se pasagjerët që kishin rezervuar udhëtimin janë përpunuar me dorë nga punonjësit e portit. Gjatë paradites së të Shtunës nuk ka proces përpunimi, sepse, nuk ka tragete në këtë orë.
Problematike po paraqitet situata në Kakavijë dhe Kapshticë, ku po punohet me regjistra me dorë për regjistrimin e hyrje daljeve nga kjo pikë kufitare, pasi sistemi TIMS është jashtë funksionit prej orësh. Megjithatë, procedurat në këtë mënyrë janë më të ngadalta dhe radhët e trafikut sa vijnë e shtohen. Radhë trafiku raportohen dhe në pikat e tjera kufitare tokësore të fundit.
E njëjtat praktikë e punës me regjistra me shkrim pritet të ndiqet edhe nga efektivët e policisë kufitare dhe në portin e Vlorës.
“Sulmi nga Irani”
Sipas raportimeve mediatike, në kompjuterat e punonjësve të policisë është shfaqur një mesazh: “Shqipëria po vuan dhe do të vuajë ende, për përkrahjen që i ka dhënë iranianëve të MEK”.
Kryeministri Edi Rama, përmes një njoftim në Twitter, konfirmoi se Irani ka kryer një sulm kibernetik ndaj sistemit. “Një tjetër sulm kibernetik nga të njëjtët agresorë, tanimë të ekspozuar dhe dënuar prej vendeve aleate e mike të Shqipërisë, është shënuar mbrëmë mbi sistemin TIMS! Ndërkohë vazhdojmë punojmë përditë pa orar me aleatët për t’i bërë të papenetrueshme sistemet tona digjitale”, shkroi ai në Twitter.
Në rrezik informacione sekrete
Por, burime policore bënë me dije se sulmi është shqetësues dhe ka prekur më shumë se sistemin TIM. Sipas të njëjtave burime, janë sulmuar serverat e Policisë, duke bllokuar gjithë sistemet online me të cilat operojnë në punën e përditshme forcat e sigurisë. Në to ka të dhëna sensitive për persona me rrezikshmëri të lartë shoqërore, si edhe operacione të ndryshme, përfshirë edhe informacione të klasifikuara sekret, që rrezikojnë të bien në dorën e hakerave.
“Offline” është edhe faqja zyrtare e Policisë së Shtetit.
Sulmi i dytë prej 15 Korrikut
Pak ditë më parë, kryeministri Edi Rama njoftoi ndërprerjen e marrëdhënieve diplomatike me Iranin dhe dëbimin e punonjësve të ambasadës iraniane në Tiranë. Shkaku, shpjegoi, lidhet me sulmin kibernetik të 15 korrikut ndaj faqeve shtetëtore online. “Hetimi i thelluar na vuri në dispozicion prova të pakundërshtueshme, se agresioni kibernetik ndaj vendit tonë është orkestruar dhe sponsorizuar nga Republika Islamike e Iranit, e cila ka angazhuar katër grupe për sulmin ndaj Shqipërisë”, tha Rama.
Pas rënies së faqeve, një grup i vetëquajtur “Homeland Justice” (Drejtësi për Atdheun) pretendoi se ka qenë pas hakerimit të e-albania dhe faqeve të tjera shtetërore. Për ta pohuar këtë, ky grup publikoi në rrjetet sociale një folder brenda të cilit gjendeshin materiale të institucioneve më të rëndësishme të shtetit shqiptar. Justifikimi i sulmit të tyre u shpjegua nën parullën: “Pse duhet qe të shpenzohen taksat tona per terroristët e Durrësit”, duke iu referuar ish-muxhahedinëve iranianë (MEK) që janë strehuar në Manzë të Durrësit.
