Nga BoldNews.al
Qeveria po mbush magazinat shtetërore me mallra ushqimorë. Megjithëse jemi disa muaj para zgjedhjeve lokale, mazhoranca ka filluar “përgatitjet”, ku edhe kësaj herë nuk do të mungojnë pakot për të blerë vota. Një procedurë tepër e dyshimtë, pasi tenderi pritet që të zhvillohet në muajin dhjetor 2022, për të blerë ushqimet në pranverë, në kohën kur edhe do të mbahen zgjedhjet lokale. Me kthimin e Berishës të PD dhe Metës të PL (ish LSI), pritet që të ketë një garë të zjarrtë për krerët e bashkisë.
Mazhoranca ka filluar me kohë përgatitjet, duke përdorur paratë publike. Herë duke bërë tendera rrugësh, herë me fondet e tërmetit apo rasti i Lali Erit me propagandë. Por, “buka e gojës” gjithmonë ka sjellë vota, të paktën me komunitete të pafavorizuara apo ata që marrin ndihmë ekonomike. Një pako me ushqime ka sjellë në kutitë e votimit dhjetëra vota, ndërsa këto kategori janë përdorur rëndom nga të gjitha krahët e politikës.
Sipas dokumenteve që disponon BoldNews.al, Drejtoria e Përgjithshme e Rezervat e Shtetit pritet të hapë një tender të majmë për blerje ushqimesh. Mësohet se burimi i financimit për këto ushqime është nga buxheti i shtetit. Në të njëjtin dokument shkruhet se fondi i kësaj procedure është 125.000.000 lekë, ose me TVSH rreth 1 milionë euro. Koha e bërjes së tenderit është në muajin dhjetor, disa muaj para zgjedhjeve lokale që pritet të dekretohen në pranverë nga Presidenti i Republikës, Bajram Begaj.
Në dokumente shkruhet se Drejtoria e Përgjithshme e Rezervave të Shtetit do të blejë oriz, fasule, mish viçi, vaj gatimi, miell gruri, sheqer të bardhë, makarona të papjekura, kripë, dhe ujë natyral. Pra, një pjesë e mirë e shportës që është përdorur në të kaluarën për të blerë vota në shtresat në nevojë. Mësohet se çdo bashki ka përpiluar lista me familjet në nevojë dhe kjo listë pritet që t’i dërgohet edhe Rezervave të Shtetit.
Shpërndarja e ushqimeve pritet të kryhet në muajin shkurt, mars apo prill. Por, krahas këtij tenderi, bashkitë kanë bërë gati procedura të ndara për të blerë ushqime, ndërsa ajo që vihet re është se ushqime blihen në vite zgjedhore.
