Turku Faruk Ozer, i cili akuzohet për mashtrim me kriptomonedhat në vlerën e 2 miliardë Dollarëve, ka dalë sot para gjykatës dhe i është caktuar masa e sigurisë arrest në burg.
Avokatja e tij, në një deklaratë për mediat, tha se do ta apelojë vendimin. Avokatja i cilësoi gënjeshtra lajmet e mediave shqiptare dhe turke, ndërsa sipas saj Faruk Ozer i ka dëmshpërblyer një pjesë të klientëve që ishin mashtruar me kriptomonedhat.
“Ai do të jetë në burg për procesin e ekstradimit. Ne do ta apelojmë vendimin. Bëhet fjalë vetëm për politikë. Në mediat shqiptare dhe ato turke thuhen gënjeshtra për akuzat ndaj tij. Ne mund të themi prokuroria e Turqisë dhe institucionet atje thuhet se dëmi është 20 mln dollarë dhe jo 2 miliard dollarë siç thuhet në media. Ai nuk është personi përgjegjës për ato krime që e akuzojnë. Nga 20 mln dollarë dëm, gjysma e tyre i janë kompensuar familjeve. Dhe gjysma e familjeve të dëmtuara i kanë tërhequr pretendimet. Ka arsye politike. Ai erdhi si biznesmen në Shqipëri, erdhi për të investuar”, tha avokatja.
