Ish-dejtoi i RTSH-së, Thoma Gëllçi, është liruar nga burgu, pas përfundimit të kohës së shlyerjes së dënimit.
Gjykata e Posaçme e dënoi në Qershor Gëllçin me 1 vit e 4 muaj burg me gjykim të shkurtuar, për akuzën e shpërdorimit të detyrës. Si masë plotësuese gjykata caktoi edhe heqjen e të drejtës për të ushtruar funksione publike për 5 vjet.
Ish-dejtoi i RTSH-së u arrestua mbrëmjen e 8 dhjetorit 2021 dhe u hetua e gjykua nën masën arrest me burg.
Gëllçi u akuzua nga Prokuroria e Posaçme për shkelje ligjore në një procedurë prokurimi për blerjen e pajisjeve për kanalin RTSH Agro. Sipas hetimit, ai ka nisur procedurat e tenderimit ende pa marrë miratimin për hapjen e këtij kanali nga autoriteti i mediave audiovizive, i cili më herët kishte refuzuar mbylljen e kanalit RTSH fëmijë për ta zëvendësuar me RTSH Agro. Gëllçi po ashtu u akuzua se ka favorizuar firmën fituese të tenderit, duke zgjatur afatin e dorëzimit të produkteve.
Bashkë me të u arrestuan e dënuan edhe dy ish-vartësit e Thoma Gëllçit, Julian Tapia dhe Ervin Murja, të cilët po ashtu janë liruar nga qelia me përfundimin e dëimit.
