Gjykata e Posaçme ka dënuar me 1 vit e 4 muaj burg ish-drejtorin e Radiotelevizionit Shqiptar Thoma Gëllçi me akuzë e shpërdorimit të detyrës
Si masë plotësuese gjykata caktoi edhe heqjen e të drejtës Gëllçit për të ushtruar funksione publike për 5 vjet.
Vuajta e dënimit sipas treshes së gjyqtarëve do të kryhet në një burg të sigurisë së zakonshme.
Gëllçi ka rreth 8 muaj në burg dhe sipas përllogaritjeve i mbetet të vuajë edhe 3 muaj burg.
Edhe për 4 anëtarët e tjerë të komisionit të vlerësimit të ofertave u vendos dënimi me nga 1 vit burg, por pritet të lirohen pas pak ditësh pasi e kanë ezauruar dënimin në paraburgim.
Ish-drejtori i RTSH bashkë me tre punonjës akuzohen për pabarazi në tenderë dhe abuzim me detyrën në kohë kur Gëllçi ishte në detyrë.
Shkelja bën fjalë për një tender të vitit 2018 me fond prej 86 milionë lekë për blerjen e pajisjeve për kanalin RTSH Agro, ku tre anëtarët e Komisionit të Vlerësimit të Ofertave, Alban Malaveci, Ervin Muraj dhe Julian Tapia akuzohen për shkelje të barazisë në tenderë.
Nga hetimet gjithashtu ka rezultuar se Thoma Gëllçi si ish-drejtori i Përgjithshëm i Radio-Televizionit Shqiptar ka kryer shkelje ligjore në këtë procedurë prokurimi dhe akuzohet për shpërdorim detyre
Gëllçi u arrestua më 8 tetor gjatë një operacioni të SPAK në bashkëpunim me Policinë e Shtetit.
