Gjykata e Lartë ka prishur vendimin e Apeli i Posaçëm Antikorrupsion për ish-drejtorin e RTSH, Thoma Gëllçi, duke vendosur kthimin e çështjes për rigjykim në të njëjtën gjykatë, por me një trupë tjetër gjyqësore.
“Prishjen e vendimit nr. 56 datë 07.12.2022 të Gjykatës së Posaçme të Apelit për Korrupsionin dhe Krimin e Organizuar dhe kthimin e çështjes për rishqyrtim pranë asaj gjykate, me tjetër trup gjykues”, thuhet në njoftimin e Gjykatës.
Më herët, Apeli e kishte dënuar Gëllçin me dy vite burg për shpërdorim detyre, dënim që, për shkak të gjykimit të shkurtuar, u ul në 1 vit e 4 muaj. Ai ishte arrestuar në vitin 2021, nën akuzën se bashkë me tre punonjës kishin abuzuar me detyrën gjatë një procedure për zgjatjen e kontratës për blerjen e pajisjeve për kanalin RTSH Agro.
Çështja lidhet me një tender të vitit 2018 me fond prej 86 milionë lekësh, ku tre anëtarët e Komisionit të Vlerësimit të Ofertave, Alban Malaveci, Ervin Muraj dhe Julian Tapia, akuzoheshin për shkelje të barazisë në tenderë.
Ndërkohë, Gjykata Evropiane e të Drejtave të Njeriut kishte vlerësuar më herët si të paligjshëm arrestimin e Gëllçit, duke konstatuar se argumentet për ndalimin e tij ishin të pambështetura dhe tepër të përgjithshme.
