Berlin – Kreu i degës ekzekutive të Bashkimit Evropian dhe kancelari i Gjermanisë premtuan të hënën një reformë të tregut të energjisë elektrike të kontinentit për të ndihmuar në uljen e çmimeve të energjisë që janë ngritur edhe më lart prej rritjes së çmimeve të gazit.
Presidentja e Komisionit Evropian Ursula von der Leyen tha në një fjalim në Bled, Slloveni, se çmimet në rritje të energjisë elektrike “po ekspozojnë tani kufizimet e modelit aktual të tregut tonë të energjisë elektrike”.
“Ai u zhvillua për rrethana të ndryshme,” tha von der Leyen. “Kjo është arsyeja pse ne po punojmë tani për një ndërhyrje emergjente dhe një reformë strukturore të tregut të energjisë elektrike”.
Tregu i energjisë elektrike i kontinentit mbështetet nga një sistem “rendi i meritës” në të cilin termocentralet që ofrojnë energjinë më të lirë kontaktohen të parat, por çmimet përcaktohen nga termocentralet e fundit dhe më të shtrenjtë që do të shfrytëzohen – aktualisht, ata që përdorin gaz, të cilëve çmimi u është rritur ndjeshëm pas reduktimit të furnizimeve nga Rusia për disa shtete evropiane në mes të luftës në Ukrainë.
Kancelari gjerman Olaf Scholz, duke vizituar Pragën të hënën, tha se pyetja se si tregu evropian i energjisë elektrike mund të riformulohet “në mënyrë që ne të mos duhet të mbajmë më këto çmime të larta që po shohim aktualisht” zuri pjesën më të madhe të takimit të tij me kryeministrin çek Petr Fiala, vendi i të cilit aktualisht mban presidencën e rradhës të BE-së. Ai tha se “ne do të veprojmë së bashku shpejt”.
“Është e nevojshme që ne të bëjmë ndryshime strukturore që kontribuojnë në uljen e shpejtë të çmimeve dhe në ofertën e mjaftueshme” të energjisë elektrike, tha Scholz në një konferencë shtypi.
Ai shtoi se “ka një gatishmëri të madhe për të ndryshuar diçka dhe kjo më duket se është shumë e ndërsjellë mes krerëve të shteteve dhe qeverive në Evropë”.
“Është e qartë se ajo që kërkohet aktualisht si çmim tregu nuk pasqyron ofertën dhe kërkesën në kuptimin e duhur,” tha ai.
Duke folur më herët në Berlin, një zëdhënëse e Ministrisë gjermane të Ekonomisë tha se ideja është të ruhet parimi i sistemit të “rendit të meritës”, “por të hiqen efektet negative që ka, në mënyrë që çmimet e larta të gazit të mos ndikojnë më, menjëherë dhe automatikisht në çmimet e energjisë elektrike.”
