Partia e Lirisë denoncoi këtë të Hënë se tenderi për ujësjellësin e Memaliajt ishte i paracaktuar.
Deputeti i Partisë së Lirisë, Petrit Vasili tha se kryeministri Edi Rama, pak ditë para zgjedhjeve të 25 prillit, ka deklaruar nisjen e punimeve për ujësjellësin e Memaliajt.
Por, shpjegoi ai më tej, kjo u bë dy muaj e gjysmë para se të lidhej kontrata me kompaninë fituese të tenderit dhe dy ditë para se të zhvillohej prokurimi, ku do të shpallej dhe kompania fituese.
“Në denoncimin e mënyrës se si shpërdorohen e vidhen e trajtohen si pronë personale paratë dhe milionat euro të qytetarëve të thjeshtë. Bëhet fjalë për ujësjellësin e Memaliaj dhe fshatrat, një investim 4 miliardë e 800 milionë lekë të reja, që në 7 prill u bë publik pak ditë para fushatës elektorale të zgjedhjeve të 25 prillit. Tenderi përkatës, në realitet, kryeministri siç dihet grabitqar dhe hajdut shkon të inagurojë një investim që nuk është tenderuar akoma. Vërtetohet me dokumentet e agjencisë së Prokurimit Publik, skandali e pjesa më e rëndë, tenderi, fituesi shpallej në 9 prill kurse kryeministri që në datën 7 prill, pa e ditur kush do fitonte ka vajtur ka nisur punimet. Kontrata është lidhur më 9 qershor, dy muaj e gjysmë më vonë. Pra tenderat janë zero, paratë ndahen në tavolinë që para se ju e shikoni që procedurat s’kanë filluar e kontrata s’është lidhur. Dy muaj e gjysmë para deklarojnë kemi lidhur kontratë ndërkohë që kontrata u lidh dy muaj e gjysmë më mbrapa”, tha Vasili.
Kreu i Partisë së Lirisë, Ilir Meta u shpreh se kemi një “shtet banditësh”.
“Është e qartë që nuk kemi të bëjmë më një rast të veçantë, do nxjerrim dhe të tjera. Pra, në shtetin e këtyre banditëve, gjithçka bëhet fakt i kryer, pazaret bëhen më përpara. Tenderi është formal si çdo gjë tjetër, por edhe kontrata lidhet pas 3 muajsh. Ua kam thënë që përgjigjet e Ramës do jenë para ligjit, me firmat, provat dhe ligjet e tij, s’do falsifikojmë asnjë. Rasti më i shkëlqyer, kur partia dhe shteti shkrihen në një, partia vendos që do të nisin në 7 prill punimet. Fillon puna, del në Tv ndërkohë formalisht letrat bëhen për tenderin më vonë dhe për kontratën bëhen pas 3-4 muaj në qershor. Këtu është vrarë shteti i së drejtës, është vrarë merita, konkurrenca”, tha Meta.
