Katër të rinj janë arrestuar pasi akuzohen se po transportonin kundrejt fitimit, 9 emigrantë, me qëllim kalimin e paligjshëm të kufirit.
Dy djemtë nga Kruja u kapën nga policia e Gjirokastrës në vendin e quajtur “Ura e Lumit”, duke transportuar me automjetin tip furgon, 9 emigrantë të paligjshëm nga vendet MENA, kundrejt fitimit”, njoftoi policia.
Operacioni policor u kodua “Road Guard 35”. Të arrestura janë -E. T., 22 vjeç dhe S. V., 21 vjeç, të dy banues në Krujë.
Gjithashtu u ndaluan dhe shtetasit M. A., 21 vjeç dhe A. M., 18 vjeç, të dy nga Pakistani “pasi nga veprimet hetimore rezulton se janë organizatorë të veprimtarisë kriminale të kalimit të paligjshëm të kufirit shtetëror”, bënë me dije blutë e Gjirokastrës.
Gjatë kontrolleve të ushtruara nga shërbimet e Policisë, të 4 këtyre shtetasve iu gjetën në automjet dhe në çantën e dorës, si dhe iu sekuestruan në cilësinë e provës materiale, sasi lënde të dyshuar narkotike kanabis.
Në cilësinë e provës materiale u sekuestruan automjeti me të cilin transportoheshin këta perosna, sasia e lëndës së dyshuar narkotike kanabis, një shumë parash dhe 4 aparate celulare.
Ndaj të arrestuarve rëndojnë akuzat për veprat penale: “Dhënia ndihmë për kalim të paligjshëm të kufirit”, kryer në bashkëpunim dhe “Prodhimi dhe shitja e narkotikëve”.
