Policia e Shtetit ka publikuar sot rezultatet e punës së saj në 1 javë, ndërsa janë bllokuar pothuajse të gjitha mjetet e lundrimit, për verifikimin e dokumentacionit, pas ngjarjes tragjike të ndodhur në Potam të Himarës, ku një skaf goditi për vdekje një vajzë 7-vjeçare, e cila ndodhej në bregun e detit.
Gjatë kësaj jave, janë bllokuar 125 mjete lundurese “Jet ski”; 75 skafe të vogla dhe gomone, për verifikim të dokumentacionit dhe disa prej tyre për kryerje të manovrave të rrezikshme për pushuesit në plazhe, pranë perimetrit të sigurisë.
Policia Rrugore gjatë kësaj jave ka pezulluar 458 leje drejtimi, nga të cilat: 369 për qarkullim me shpejtësi mbi normat e lejuara, 57 për drejtim mjeti, nën efektin e alkoolit apo në gjendje të dehur dhe 32 për qarkullim në sens të kundërt.
Gjithashtu janë arrestuar 44 drejtues mjetesh, nga këta: 28 për drejtim mjeti në gjendje të dehur dhe 16 për drejtim mjeti pa leje drejtimi.
Policia njoftoi se janë goditur nga Policia Rrugore e Tiranës, 3 raste të tentativës për të korruptuar punonjësit e Policisë Rrugore dhe 1 rast për drejtim të automjetit nën efektin e lëndëve narkotike.
Po kështu janë vendosur 14.874 masa administrative, për shkeljet që janë rrezik për përfshirje në ngjarje rrugore.
