Disa qindra qytetarë protestuan sot për rreth 2 orë nga Ministria e Brendshme te Presidenca, ndërsa kërkuan drejtësi për vrasjen e 7-vjeçares Jonada Avdia, e cila u godit nga një skaf në bregdet, i cili drejtohej nga komisari i policisë Arjan Tase.
Protesta nisi te godina e Ministrisë së Brendshme, atje kur për disa minuta pati edhe një përplasje me forcat e rendit, që nuk lejuan grumbullimin e qytetarëve në sheshin para godinës.
Qytetarët kanë kërkuar drejtësi, ndërsa kërkuan dorëheqjen e Bledi Çuçit dhe Mirela Kumbaros nga postet e ministrit të Brebndshëm dhe ministres së Kulturës.
Protesta ka vijuar më pas te godina e Kryeministrisë, ku edhe janë ndezur me dhjetra qirinj në formë homazhi për humbjen e jetës së vogëlushes. Nën thirrjet “Rama ik, Rama ik”, por edhe për largimin e ministrave Çuçi e Kumbaro, protestuesit kanë qëndruar për minuta të tëra në bulevardin “Dëshmorët e Kombit”.
Më pas ata janë zhvendosur drejt godinës së Presidencës, duke shprehur revoltën e tyre për heshtjen e Presidentit, Bajram Begaj, i cili edhe 72 orë pas ngjarjes së rëndë, nuk ka dhënë asnjë reagim, qoftë edhe si qytetar. “Presidenti i turpit” ishin disa nga thirrjet që protestuesit artikuluan para Presidencës, ndërsa vijuan thirrjet për drejtësi.
Nga godina e Presidencës, iu lëshua edhe ultimatumi 72-orësh për Kryeministrin Edi Rama, i cili me shumë gjasa nuk do të reagojë, për të larguar nga detyrat Bledi Çuçin dhe Mirela Kumbaron.
Protestuesit kanë paralajmëruar mbajtjen e protestës së ardhshme ditën e hënë, 9 gusht, në orën 19:00 para godinës së Kryeministrisë.
Protesta nuk ka shënuar incidente, ndërsa policia me përjashtim të momenteve të para kur pati një konfrontim të vogël me protestuesit që tentuan të kalojnë kordonin për tu zhvendosur te sheshi, nga pas godinës së Ministrisë së Brendshme, ka vëzhguar nga larg ecurinë e protestës.
