Ish-Presidenti, Ilir Meta, aktualisht drejtues i Partisë së Lirisë, iu bashkua protestës qytetare, e cila po mbahet para Ministrisë së Brendshme, ndërsa akuzoi Kryeministrin Edi Rama lidhur me ngjarjet tragjike që ndodhin në vend.
Meta tha se nuk është rasti i parë kjo ngjarja tragjike që ndodhi në Himarë, ku një vajzë 7 vjeçare, humbi jetën pasi u godit nga skafi që drejtohej nga komisari Arjan Tase, pasi kemi edhe rastin e të riut Klodian Rasha, që u ekzekutua nga një punonjës policie.
Sipas ish-Presidentit, për këto ngjarje të përsëritura, Edi Rama nuk mund ti shmanget përgjegjësive.
“Shqipëria nuk e ka luksin që në këtë tronditje të madhe të dëgjojë përrallën mos e teproni me politikën se po na prishni imazhin në Ballkan për turizmin.
Një kryeministër i papërgjegjshëm që ka ligjin dhe nuk e zbaton, ministrat duhet të ndiqen penalisht për shpërdorim detyre. Është shpirti i protestës, prindërve që duan fëmijët e tyre qe duhet të lëvizin sa më shpejt.
Mjafton dorëheqja e Ramës, më mirë një sesa 3. Këtu kemi të bëjmë me një bandë, jo me institucione”, tha Meta.
Pjesë nga deklarata e Metës
Vetëm pak kohë më parë dy qytetarë u plagosën në Jalë, në rrethana të ngjashme dhe shumë aksidente të tjera. Asnjë masë nuk është marrë për të zbatuar ligjin, jo vetëm kaq por edhe cinizmi që thotë mos na e prisni imazhin e vendit me turizmin më të mirë në rajon. Zgjidhja është protesta, dorëheqja e gjithë ministrave përgjegjës dhe kryetarit të Bashkisë ku ka ndodhur ngjarja ose shkarkimi I tyre.
Qytetaret duhet të shumëfishojnë vrullin, intensitetin e protestës. Të vrasin frikën dhe të triumfojë liria. Familjet shqiptare janë në gjendjen më të rëndë nga ana ekonomike, nga problemet sociale, sa shumë të rinj të prekur nga fenomeni i drogës.
Të rrisim përgjegjësinë dhe të mblidhemi të gjithë, që kjo situatë papërgjegjshmërie të marrë fund dhe të mbrojmë fëmijët e shqiptareve dhe atdheun nga një klikë e papërgjegjshme.
Mjafton një dorëheqje e Edi Ramës dhe mendoj se çështja është më e thjeshtë, më mirë të kemi një dorëheqje se të kemi tre. Sepse edhe ata të tjerët, aty brenda janë.
Këtu kemi të bëjmë me një bandë, është e qartë. Kjo është ngjarje e përsëritur. Mjafton rasti i të riut Rasha, se si u vra, si mund të vritet një të ri, që shkon e blen cigare. Se si fabrikuan lajmet se ishte me armë.
