Plazhi i Potamit dhe hotelet përreth janë braktisur totalisht nga pushuesit një ditë pas ngjarjes tragjike ku u vra e mitura 7 vjeçare, Jonada Avdia. Disa tufa lulesh, rrobat e familjarëve e të vajzës mbi shezlong dhe kukulla e saj, është panorama që la pas ngjarja tragjike. Ndërkohë dëshmitarët kanë rrëfyer momentet e tragjedisë.
Një ditë pas tragjedisë ku humbi jetën vogëlushja 7 vjeçare, plazhin e Potamit në Himarë e ka pllakosur heshtja.
Disa tufa lulesh, rrobat e familjarëve e të vajzës ende mbi shezlong dhe kukulla e saj që e pret të luajë, është panorama që la pas ngjarja tragjike e një dite më parë, në vendin ku u vra 7 vjeçarja, Jonada Avdia.
Këto pushime u kthyen në tragjedi për familjarët e së miturës, por të traumatizuar nga ngjarja mbetën edhe pushuesit e tjerë, të cilët ndonëse një ditë më parë kishin mbipopulluar bregdetin, sot e kanë brakttisur vendin totalisht.
Jo vetëm plazhi ku 7-vjeçarja u përplas për vdekje nga gomonja me drejtues efektivin Arjan Tase, por edhe hoteli aty pranë ku ishin akomoduar familja e saj dhe pushues të tjerë, është boshatisur.
Ulërimat therëse, tronditja e familjarëve dhe turistëve të tjerë të pranishëm nuk mjaftuan për të përshkruar dhimbjen përballë kësaj tragjedie të madhe, ndaj pushuesit kanë zgjedhur të largohen totalisht në shenjë revolte dhe solidariteti me familjen që humbi vajzën e vogël.
E pranishme në momentin kur ndodhi ngjarja ishte edhe gazetarja Esmeralda Keta, e cila përshkruan momentet e rënda.
Edhe dëshmitarë të tjerë kanë rrëfyer atë që kanë parë në momentet tragjike.
Ndërkohë familja Avdia ka hapur dyert e mortit, për të përcjellë në banesën e fundit vogëlushen 7-vjeçare Jonada Avdia, së cilës iu pre jeta në mes ende pa nisur rrugëtimin, në kulmin e lulëzimit të saj.
