Sistemi zgjedhor aktual është shumë toksik, shprehet nënkryetari i PD-së, deputeti Oerd Bylykbashi, i cili vë theksin në ndryshimin e këtij sistemi.
“Sistemi zgjedhor aktual është shumë toksik. Nuk është sistemi i vitit 2008 është krejt tjetër. Në këtë kapje totale nga shteti na duhet me patjetër një sistem zgjedhor, i cili prodhon nevojën që një kryeministër të prodhojë marrëveshje dhe aleanca për mënyrën se si qeveris. Inceneratorët janë modeli që tregon se çfarë ndodh me një shtet të pakontrolluar”, thekson Bylykbashi.
Në një intervistë, nënkryetari demokrat shprehet se vendimi i Gjykatës Kushtetuese e bën të pamundur shpërndarjen e mandateve, dhe ky është një moment që opozita duhet të shfrytëzojë për të nisur diskutimet për ndryshimin e sistemit.
“Ka mbyllur listën, nuk ka më lista të hapura në Shqipëri, sigurisht nuk ka rrëzuar herësin. Nga ana tjetër është bërë e pamundur përllogaritja e mandateve. Në një mënyrë ose një tjetër ky sistem për shkak se është i keq e për shkak se është i pazbatueshëm duhet hequr”, tha Bylykbashi.
Ai ka shigjetuar dhe paralajmëruar deputetin Enkelejd Alibeaj dhe grupin e tij, që të mendohen mirë para se të bëjnë pazare politike dhe marrëveshje me kryeministrin Edi Rama, pasi nuk do të mungojë reagimi i tyre.
“Nëse dikujt i shkon ndër mend të përdori reformën territoriale për të bërë kështu pazaresh ne do të reagojmë”, tha ai.
