Kreu i Partisë së Lirisë, Ilir Meta nga mbledhja e komitetit organizativ të kësaj force politike atakoi fort qeverinë lidhur me korrupsionin në nivele të larta dhe nepotizmin në dogana, që i shkakton një dëm të madh financiar shtetit shqiptar.
“Performanca më e ulët në mbledhjen dhe shpenzimet e të ardhurave publike. Sepse i ka mbushur doganat me bubuzhela, patronazhistë që vjedhin të ardhurat që duhet të shkojnë për qytetarët në vend. 27% e ka Shqipëria nivelin e të ardhurave. 43% e ka Serbia. Është vjedhje. Ka një emër. Është vjedhja e Esatit. Këto janë reformat që ka bërë Esati. Shihni lajmet seç bëhet. Shikoni nepotizimin e doganave. Hapni sytë dhe ju si të tjerët, se as 20% nuk mblidhen të ardhurat për artikuj të caktuar që vijnë në dogana, se kanë bërë politikën e vjedhjes së shqiptarëve.
Në vitin 2020 Shqipëria mblodhi 19.20% të prodhimit të brendshëm të të ardhurave tatimore. Kemi performancën më të ulët të sigurimeve shoqërore me 5.8%. Sipas DoingBusiness ngarkesa tatimore është 36.6%, shumë herë më e lartë se vendet e rajonit, prandaj ikin investitorët në Shqipëri. Këtu vijnë vetëm ata për të pastruar paratë e zeza dhe ato qiellgërvishtëset”, tha Meta.
Sipas ish-Presidentit, korrupsioni ka sjell varfërinë ekstreme në Shqipëri, ndaj ai theksoi se ky komitet organizativ e ka detyrë që të monitorojë dhe të nxjerrë në pah të gjitha aferat që bëhen me tenderat publikë në çdo bashki dhe institucion tjetër.
“Të gjitha këto janë bashkë, korrupsioni në majat më të larta, varfëria në humnerat më të thella dhe tradhtia e interesave kombëtare. Ky kudo vjedh, në çdo sekondë. Në çdo bashki, a keni ju ndonjë këshilltar në të gjitha bashkitë. Nuk keni. Ju i monitoroni. Jo nuk e bëni. Do filloni ta bëni sepse Revolucioni Antikorrupsion do ketë edhe një strukturë, edhe koordinator në çdo qark, bashki dhe çdo institucion ku vidhet. Se duhet të parandalojmë falimentimin e Shqipërisë se ai e ka projekt këtë”, nënvizoi Meta.
