Ish-deputeti Lefter Maliqi, është shprehur se Kryeministri Edi Rama, ka nisur të reagojë tani që Sali Berisha ka dalë në skenë dhe sipas tij këtij të fundit shumë shpejt do i bashkohet edhe Ilir Meta.
Në një intervistë për Ora News, Maliqi është shprehur se Meta së bashku me Berishën do të bëjnë të mundur rrëzimin e Kryeministrit Edi Rama nga qeveria.
“Edi Rama lëviz tani që doli në skenë dhe do të dalë në skenë më datë 25 Ilir Meta. Kjo dyshe, do ta bëjë të mundur rrëzimin e tij. 7 Korriku është shenja e parë dhe të shohim vjeshtën apo tetorin nëntorin se çdo të ndodh me këtë front opozitar”, tha ish-deputeti.
Maliqi teksa ka rikujtuar ngjarjet që kanë ndodhur kohët e fundit në vendin tonë tha se jemi në një situatë të rëndë kriminale dhe ekonomike.
Ai tha se Berisha, Meta dhe socialistët e ndershëm do ta rrëzojnë Ramën dhe do ta çojnë në birucë. Sipas Maliqit, nëse Rama do shkonte në burg, Saimir Tahiri, Alqi Bllako dhe Lefter Koka do të tregojnë çdo gjë për të.
“Në Vlorë janë dhjetëra njerëz të zhdukur që nuk i janë gjetur kockat nga familjarët. Po kështu ke dhe në Lushnje, ke banda kriminale. Kështu ke dhe në Tiranë. Kemi disa ngjarje të bujshme në një vend kaq të vogël me dy milionë banorë. Krimi është bërë njësh me politikën. Jemi në një situatë tepër të rëndë kriminale të pasigurtë dhe ekonomike në vend për shkak të kapjes së gjithë institucioneve. Për shkak të kapjes së të gjithë institucioneve, për shkak të komandimit të institucioneve, për shkak të komandimit të institucioneve të drejtësisë dhe kapjes përfundimtare të gjithë pushtetit lokal.
Ky do ti gropos të gjithë njerëzit derisa Sali Berisha, Ilir Meta bashkë me popullin opozitar së bashku me socialistët e ndershëm ta rrëzojnë nga froni dhe ta çojnë në birucë. Atëherë do të shihni se si Saimir Tahirin, Bllakon, Kokën se çfarë do të tregojnë për Ramën. Por kam frikë se edhe nëpër burgje me mafien mund t’I bëjë të pabërën këtyre që i futi në burg”, tha Maliqi.
