Mbrëmjen e kaluar rreth orës 23:00, është arrestuar në flagrancë punonjësi i policisë K. Mulaj 47 vjeç me detyrë në regjimin e brendshëm, në IEVP Kukës.
Arrestimi i tij ndodhi pasi rreth orës 15:00, të së martës, gjatë hyrjes në institucion pas ushtrimit të kontrollit nga kolegët e tij, i është gjetur në këmbën e majtë poshtë çorapes i 1 paketë cigaresh e mbështjellë me ngjitës të tejdukshëm (natriban), ku brenda saj ishin 20 doza të dyshuara lëndë narkotike (marijuanë), me peshë 16.65 gr.
Materialet i janë referuar Prokurorisë Pranë Gjykatës së Shkallës së Parë Kukës, për veprat penale “Prodhim dhe shitje të lëndëve narkotike” si dhe “Futja dhe posedimi i sendeve të ndaluara në IEVP”.
Ka dyshime që lënda narkotike të ishte porositur nga një i dënuar, emri i të cilit ende nuk bëhet i ditur, ndërsa autoritetet po hetojnë nëse ka patur raste të mëparshme të veprimeve të tilla nga ana e punonjësit të policisë.
