Detaje të reja kanë dalë në dritë lidhur me sekuestrimin e rreth 46 kilogramëve lëndë narkotike në Aeroportin Ndërkombëtar të Rinasit
Sipas raportimeve në media, për transportimin e lëndës narkotike dyshohen tre persona, një çift me shtetësi shqiptare dhe një shtetas i huaj.
Njëri prej të arrestuarve është identifikuar si Kristian Gjoni. Mësohet se ai ka tentuar fillimisht të shmangë kontrollin e bagazheve, duke pretenduar se bashkëshortja e tij ishte shtatzënë dhe, për këtë arsye, nuk duhej t’i nënshtrohej procedurave të kontrollit.
Megjithatë, pas një verifikimi mjekësor, ka rezultuar se pretendimi nuk ishte i vërtetë. Më pas, autoritetet kanë kryer kontrollin e bagazheve, ku u zbulua sasia prej rreth 46 kilogramësh lëndë narkotike, e dyshuar e llojit Cannabis sativa, e ndarë në dhjetëra paketime.
Në vijim të operacionit, çifti shqiptar dhe shtetasi i huaj u arrestuan, ndërsa lënda narkotike u sekuestrua si provë materiale.
