Partia Demokratike dhe shoqëria civile mblodhën dje në bulevardin “Dëshmorët e Kombit” me mijëra qytetarë që kërkuan largimin e Edi Ramës si kryeministër.
Në reagimet që pasuan protestën, duke mos pasur mundësinë e argumenteve apo fakteve se qytetarët nuk e mbështetën, socialistët kanë nisur aplikimin ose të teorive konspirative, ose ato të ndarjeve mes qytetarëve, në banorë të Tiranës apo rretheve.
Në fund të fundit ato që protestuan dje në bulevard ishin shqiptarë, që jetojnë brenda territorit shqiptar, ose në emigracion, që i ka bashkuar një apo disa kauza dhe që nuk shohin shpresë te ajo çka mund të ofrojë më shumë Qeveria Rama.
Pas Erion Veliajt që mori flamurin e ndasisë, duke u shprehur se Tirana nuk mbështeti protestën dhe ata që erdhën ishin nga rrethet, ishte Damian Gjiknuri, Sekretari i Përgjithshëm i PS, i cili doli me teorinë konspirative se protesta e Tiranës mund të ketë lidhje me atë të Shkupit dhe që të dyja mund të jenë kundër integrimit.
“Ne jemi dëshmitarë të ndryshimeve që kanë ndodhur, po këto nuk kanë ardhur rastësisht. Nuk duhet t’i lemë asnjëherë në mes ato. Kujt duhet t’ia lëmë, atyre që dalin në shesh? Ata dalin se ai tjetri do të legjitimojë veten e tij, atë hall ka. Jo se pret të fitojë pushtetin nga rruga. Nganjëherë madje më duken të koordinuara, se del proteston Opozita në Maqedoni kundër integrimit Europian, duket sikur ka lidhje. Kështu bën dhe ky zotëria jonë këtu në Tiranë. Nuk dua të bëj konspiracione, po rastësitë nuk janë gjëra që duhen shmangur. Pra ka një rastësi me një plan konkret, megjithatë unë nuk dua të bëj nga ato spekulimet e mëdha po pikërisht këtë lloj opozite kemi. Ne duhet t’i themi ndal me forcën tonë duke organizuar partinë”, tha Gjiknuri.
Por edhe kjo hipotezë e Gjiknurit rrëzohet pasi në fjalimin e tij Sali Berisha i drejtoi një thirrje BE për të hapur negociatat me Shqipërinë, gjë të cilën Edi Rama kur ishte në opozitë nuk e artikulonte as me veten e tij, dhe jo më të bënte thirrje publike.
