Policia e Shtetit duket se do të zbatojë të njëjta skenarë që aplikoheshin më parë nga Sandër Lleshaj dhe Ardi Veliu, ish-ministër i Brendshëm dhe ish-Drejtor i Përgjithshëm i Policisë së Shtetit, me protestat e opozitës.
Nëse i referohemi raportimeve, ashtu si edhe më parë Policia e Shtetit do të angazhojë në terren rreth 1200 trupa policore, përfshi këtu edhe repartet FNSH, Shqiponja dhe agjentët civilë.
Forcat policore speciale do të jenë të përqëndruara pas godinës së Kryeministrisë, por edhe në oborrin e Ministrisë së Brendshme, ndërkohë që gjithashtu në tarracat e godinave qeveritare do të ketë gjithashtu efektivë të këtyre trupave policore, krahas atyre të Gardës së Republikës.
Sipas raportimeve plani policor do të nis zbatimin nga orët e paradites, ku në pikat hyrëse të Tiranës, si dhe në pikat dalëve të qyteteve kryesore të vendit do të ketë kontrolle policore. Kontrolleve do i nënshtrohen jo vetëm automjetet, por edhe personat që mund të udhëtojnë me to si pasagjerë, me arsyetimin për të shmangur sendet e paligjshme që mund të kenë qytetarët. Nuk dihet konkretisht se për çfarë sendesh të paligjshme bëhet fjalë, pasi edhe kur protestat kanë precipituar në përplasje, ato që janë përdorur nga protestuesit ose kanë qenë shkopinjtë e flamujve ose gurët që janë gjetur në rrugë.
Gjithsesi duket se i gjithë ky plan policor duket si një presion ndaj qytetarëve që mund të protestojnë, edhe pse e drejta e tubimeve është kushtetuese. Mesa duket nga informacionet që mbledhin, Qeveria dhe strukturat e saj, i druhen një proteste masive qytetare.
