Kru demokrat Sali Berisha tha se në protestën e 7 korrikut krijohet fronti i përbashkët kombëtar, i cili do të finalizojë rrëzimin e regjimit të Edi Ramës.
Berisha tha se kjo qeveri nuk ka asnjë interes për qytetarët shqiptarë, nuk i jep përgjigje asnjë problemi të qytetarëve dhe vendit, por me vendimet e saj i ngushton çdo ditë e më shumë lakun në qafën e qytetarëve. Kreu i PD tha se Rama nuk mund të tallet më me shqiptarët, ndaj dhe reagimi ynë do të jetë i fuqishëm.
Sipas kreut të PD, nuk ka asnjë integrim me Edi Ramën, pasi Qeveria e tij nuk plotëson kriteret. Berisha tha se ne duhet të bëjmë gjithçka për suksesin e protestës së 7 korrikut.
“Në rrafshin shqiptar, kjo qeveri vendos për t´i thënë “Jo” ose “Po” ftesës për në Bruksel, ndërsa nuk njofton asnjë institucion shqiptar, Presidentin dhe Parlamentin, ndërsa na njofton se u lidh me Aleksandar Vuçiç. Edi Rama sulmon në mënyrë të shpëlarë një vend mik si Bullgaria, nga i cili 32 vitet e fundit shqiptarët kanë pasur vetëm mirësi dhe miqësi. Nuk na kanë bllokuar bullgarët ne negociatat, por Edi Rama”, tha Berisha.
Ai akuzoi Kryeministrin Edi Rama se nuk punon për të zgjidhur problemet e qytetarëve, por punon për kapital politik ose kapital tjetër. Në këtë aspekt, Berisha u ndal në rritjen e çmimeve që caktohen nga bordet, ndërsa shtoi se ka një klimë mbytëse për bizneset.
“Me mijëra profesionistë të profesioneve të lira ose do të lenë Shqipërinë ose do të mbyllin zyrat e tyre për shkak të taksës që vendosi Edi Rama”, tha Berisha.
Kreu demokrat tha se ne duhet ti japim Edi Ramës një përgjigje të fortë, është një moment jetik për vendin. “Ne duhet ti japim përgjigjen e duhur kësaj qeverie, sikundër kjo lëvizje e jona synon të rivendosë të drejtat e mohuara, ndaj dhe ne përshëndesim mbështetjen që na jep diaspora. Diaspora është një aksioner shumë i rëndësishëm në zhvillimin e vendit dhe shoqërisë”, tha Berisha.
Sipas tij, ata nuk quhen më reaksionarë si në kohën e diktaturës, por sot atyre i është vendosur një perde e hekurt, nuk lejohet të votojnë.
