Ligjvënësit në Bullgari përmbysën një veto të qeverisë së Sofies kundër hapjes së bisedimeve për anëtarësim mes Maqedonisë së Veriut dhe BE-së, – një vendim që ka mbajtur peng edhe Shqipërinë përgjatë dy viteve të fundit, – por kanë këmbëngulur në disa kushte që duhet të plotësohen nga Shkupi.
Katër parti politike u bashkuan për të siguruar një maxhorancë parlamentare për një propozim nga presidenca franceze që synon të kapërcejë një numër mosmarrëveshjesh mes Sofies dhe Shkupit mbi gjuhën, historinë dhe të drejtat e bullgarëve etnikë në Maqedoninë e Veriut, raportoi politico.eu.
Gjithsesi, mbetet për t’u parë nëse qeveria e Maqedonisë së Veriut do ta pranojë të ashtuquajturin “propozim francez”.
Lojërat politike nacionaliste në Sofie dhe, në një masë më të vogël, në Shkup, ku trajtohen probleme të identitetit bullgar dhe identitetit maqedonas dhe mënyrës se si duhet t’i referohet bota gjuhëve të folura në këto vende, kanë vijuar prej kohësh duke sjellë pamundësi në Këshillin e Bashkimit Evorpian për të vendosur një datë për thurrjen e konferencës së parë ndërqeveritare mes BE-së dhe Maqedonisë së Veriut dhe Shqipërisë për hapjen e bisedimeve për anëtarësim.
Kryeministri shqiptar Edi Rama u shpreh i lumtur nga lëvizja në parlamentin bullgar dhe falënderoi Boyko Borisov, ish-kryeministër i Bullgarisë, i cili duket se organizoi opozitën bullgare për t’iu kundërvënë qeverisë së kryeministrit Kiril Petkov, i cili e humbi shumicën parlamentare dhe pritet të zëvendësohet.
“Sapo mora një telefonatë nga Boyko Borissov,” deklaroi Rama në Tëitter. “Nuk mund ta falënderoj mjaftueshëm për mendimin e mirë që të më telefononte, por mund ta falënderoj atë për rolin e tij vendimtar në heqjen e Vetos në parlament,” shkroi Rama.
Tani i takon Shkupit të deklarohet nëse e pranon propozimin e Francës dhe nëse po, më pas, i takon Këshillit të Bashkimit Evropian që të përcaktojë datën për hapjen e bisedimeve.
Bisedimet për anëtarësim mund të zgjasin gjithsesi shumë vite dhe, eksperienca e vendeve të tilla si Serbia, të cilët i kanë hapur, tregon se këto bisedime mund të pezullohen ndërsa vendet kandidate duhet të plotësojnë kushtet për anëtarësim, përfshirë të pasurit të një demokracie funksionale, të shtetit të së drejtës, të standardeve mjedisore të larta etj.
Shqipëria vlerësohet se ka përgatitje të paktë ose mesatare për shumicën e kritereve për anëtarësim. /BIRN/
