Kryetari i Partisë Demokrate, Sali Berisha paralajmëroi këtë të Premte se protesta e parashikuar për në 7 Korrik, nuk do të ndalet deri në arritjen e qëllimet.
Në konferencën e përjavshme për gazetarët nga selia blu, ish-kryeministri u shpreh se “protestat duhet të jenë të atilla që nuk do të ndalen deri në realizimin e qëllimit”.
“Kush do të jetë kjo protestë, do të përcaktojë vetë protesta. Kjo lëvizje është një front për shpëtimin e Shqipërisë. Unë jam i gatshëm edhe të udhëheq edhe të më udhëheqin”, shtoi ai.
Berisha ftoi edhe një herë shqiptarët të bashkohen më 7 Korrik.
I pyetur nëse do të ndalojë protestuesit nëse do duan të futen në kryeministri, Berisha u përgjigj: “I vetmi kryeministër që ia mbath para se të nisë protesta (është Rama). Është e vërtetë kjo. S’ka ndejt kurrë në kryeministri. Ndiqeni atë ditë, ai në asnjë protestë të jeni të sigurt se s’ka qëndruar në zyrë. Kemi të bëjmë me një front, s’jam unë, unë jam njeri prej aktorëve në këtë front. Dhe vendimet merret nga fronti”
Interesit të gazetarëve se kush është tema e protestës, kryetari i PD-së i dha këtë përgjigje: “Tema kryesore është interesi kombëtar, interesi individual nga çmimet, taksat e tmerrshme që po vendosen mbi biznesin e vogël dhe profesionet e lira dhe natyrisht arbitrariteti i tmerrshëm ndaj qytetarëve. S’mund të mos jetë edhe një qëllim anti-Soros, e konsideroj një armik të stabilitetit. Në projekte sinkron me Lavrovin e Putinin, Soros dëshmon se është i rrezikshëm për paqen në Ballkan”.
Berisha ftoi që “koalicionit opozitar” ti bashkohet dhe Ilir Meta pas detyrës si President.
I pyetur se si do të organizohet opozita, Berisha tha: “Ideja ime është një fron opozitar me një udhëheqje kolektive, natyrisht rol qendror ka PD”. “Kontributi i çdo force politike dhe faktori tjetër, organizata të shoqërisë civile, individëve të spikatur, janë të mirëpritur, jemi të hapur. Edi Rama duhet të përballet me frontin për shpëtimin e Shqipërisë”, shtoi ai.
