Kur u duk se ishte vetëm një hap larg për t’u zyrtarizuar si futbollisti më i ri i Interit, situatat mes Dybalas dhe zikaltërve ka ngecur.
Argjentinasi ndodhet ende në Majemi ku po shijon pushimet dhe agjenti i tij tregon se ende nuk ka diçka konkrete mes palëve. Mediat italiane theksojnë se ish-futbollisti i Juventusit është gati për një kontratë 4-vjeçare me 6 milionë euro në sezon plus 1 milion në formë bonusesh.
Gjithsesi, Interi duhet të lehtësohet nga paga e disa lojtarëve për të nisur negociatat me argjentinasin. Pra, fillimisht është i detyruar të shesë, Sancezh, Xheko apo Korrea dhe vetëm në këtë mënyrë mund të afrojë Yllin e Argjentinës.
Aktualisht nuk është parashikuar asnjë takim mes palëve ndërsa së fundmi në garë është vënë dhe Milani. Kuqezinjtë kërkojnë të përfitojnë nga ky moment dhe pse paga që Dybal-a kërkon nuk mund të përballohet dot nga klubi. Megjithatë djalli shpreson se me kalimin e kohës dhe mungesën e alternativave real, lojtari mund të ulë kërkesat ekonomike çfarë mund ta dërgonte në marrëveshjen me milanistët.
