Kreu demokrat Sali Berisha ka thumbuar ambasadoren amerikane Yuri Kim, e cila pak ditë më parë në një konferencë anti-korrupsion të mbajtur në Tiranë, tha se Qeveria po luftonte korrupsionin, referuar pjesëmarrjes së të pranishmëve në sallë.
Por Berisha tha se kjo është një tallje e madhe me shqiptarët. “Të thuash se Edi Rama po lufton korrupsionin se mbush një sallë, është tallje e madhe. Çdo vendim i qeverisë, në çdo gërmë, është vjedhje dhe vetëm vjedhje”, tha Berisha.
Ai paralajmëroi se me 7 korrik në Tiranë do të organizohet një protestë e madhe. “Kjo është betejë, duhet të shtrihen në të gjithë vendin”, tha Berisha.
Deklaratat kreu demokrat i bëri gjatë një tryeze me shoqërinë civile, ku iu kërkua nisja e protestave, dhe jo mbajtja e tyre në shtator, sikundër ishte paralajmëruar.
Berisha vuri theksin në krijimin e një fronti të përbashkët, ndërsa kërkoi një punë intensive për suksesin e protestës sonë më 7 korrik. “Me këtë sistem ne nuk pajtohemi, është një sistem monist, i cili shkel çdo të drejtë kushtetuese. Ky nuk është më pushtet kushtetues, është pushtet i dalë nga patronazhistët”, tha Berisha.
Ai tha se në kuadrin e frontit opozitar do të bëhen takime me të gjitha partitë opozitare dhe grupet e interesit, ndërsa qytetarët duhet ta dinë se ne do të mbrojmë interesat e tyre.
