Kryetarja e LSI-së, Monika Kryemadhi ka ironizuar konferencën Anti-Korrupsion të mbajtur ditën e sotme nga qeveria, duke thënë se edhe ish kryebashkiaku i Vorës, Agim Kajmaku do të drejtonte një panel në konferencë nëse nuk do ishte arrestuar për drogë.
Në reagimin e bërë Kryemadhi shkruan se pikërisht ata që Rama i konsideronte si “kampionë” sot ishin në burg. Ndërsa shton se ekzekutivi ishte pushteti më i korruptuar në Shqipëri.
Reagimi i Plotë nga Monika Kryemadhi:
Edhe Kajmaku i Vorës do drejtonte një panel te kjo konferenca e qeverisë për korrupsionin, nëse nuk do e kishin arrestuar italianët. Patjetër, sepse të gjithë çfarë janë në burg sot nga Rilindja, më parë kanë qenë “kampionët” e kryeministrit.
Reformën në drejtësi e miratuam bashkarisht si klasë politike në vitin 2016, që lufta ndaj korrupsionit të ishte përherë ekskluzivisht fusha e veprimit, e një sistemi të pavarur nga politika, të pa ndikuar nga pushteti legjislativ dhe ai ekzekutiv. Ky i fundit, dmth qeveria, është edhe më i korruptuari!
Ndërkohë që punojësit civil të çuar me detyrim në takim dëgjuan fjalimin propagandistik të kryeministrit, i gjithë vendi pret me padurim forcën e veprimit të drejtësisë ndaj zyrtarëve të inceneratorëve: një skemë korrupsioni në bashkëpunim, e faktuar në letra dhe firma, që ka përfshirë kryeministrin, zyrën e tij, ministra, kryetar bashkie, biznese të vërtetë dhe fiktivë.
Korrupsion qeveritar ka, por duhen profesionistë të pavarur në drejtësi ta luftojnë atë!
