Presidenti Ilir Meta ka folur në Çim Peka Live për dekretin që firmosi në Stamboll, i cili i hapi rrugën Bajram Begajt për t’u zgjedhur President i Republikës.
Meta tha se nuk ka shkelur Kushtetutën, ndërsa komentoi edhe deklaratat e kryetarit të PD, Sali Berisha.
“Se çfarë thotë Berisha për dekretin për Begaj, është e drejtë e tij. Nëse ka njeri në këtë tokë më koherent në mbrojtje të Kushtetutës, më falni për modestinë, por ai është Ilir Meta.
Ku është e shprehur kështu (në Kushtetutë)? Presidenti përgjigjet për zbatimin e Kushtetutës, në nenin 93 thuhet Presidenti i Republikës në zbatim të kompetencave të tij nxjerr dekrete.
Nuk ka asnjë përcaktim, asnjë përkufizim, ndalim, sa ku i nënshkruan dekretet presidenti, në zyrë, në hollin e presidencës, spital, shtëpi nëse është me COVID, apo mund ta nënshkruajë jashtë territorit të Republikës së Shqipërisë për një rast të caktuar.
Në rastin e Presidentit nuk jemi si në rastin e Kryeministrit që ka zv/kryeministrin. Në rastin e Presidentit është shumë e qartë në Kushtetutë, neni 91, kur presidenti është në pamundësi të përkohshme për të ushtruar funksionet e tij, ose kur vendi i tij mbetet vakant për arsye se humb jetën, kryetari i Kuvendit zë vendin dhe ushtron kompetencat.
E dyta, duhet të përcaktohet edhe me Gjykatë Kushtetuese, Komision Mjekësor që presidenti është i pamundur të ushtrojë këto funksione dhe këto i kalojnë Kryetarit të Kuvendit. E gjitha kjo është një spekulim. Procedura ka qenë shumë e qartë dhe shumë transparente”, tha Meta.