Ministri i Drejtësisë, Ulsi Manja i është përgjigjur deklaratës së ish kryeministrit, Sali Berisha menjëherë pas ky i fundit deklaroi se Shqipëria nuk nënshkruante marrëveshje ekstradimi me vendet e Beneluksit (Hollanda, Belgjika dhe Luksemburgu), pasi do të sillte ekstradimin e disave prej ministrave dhe deputetëve për përfshirje në ngjarje kriminale.
Manja i quajti deklaratat e Berishës si sajesa ndërsa shtoi se nuk kishte pasur asnjë kërkesë nga këto vende për të nënshkruar marrëveshje ekstradimi me Shqipërinë.
Ndërkohë dihet tashmë se shumë zyrtarë të vendit janë të inkriminuar dhe për këtë Manja nuk tha asnjë fjalë.
Ministri i Drejtësisë, Ulsi Manja: Lidhur me atë që deklaroi zoti Berisha se qeveria shqiptare ka bllokuar marrëveshjet e ekstradimit me vendet e Beneluxit. Nuk e di se si kjo kërkesa ka shkuar më parë në zyrën e Berishës. Dua të jem i qartë. Sot nuk ka asnjë pengesë në fushën e bashkëpunimit gjyqësor as me Belgjikën, Holandën apo Luksemburgun. Bashkëpunimi është në nivele të kënaqshme.
Me Belgjikën kemi një marrëveshje dy-palëshe për personat e dënuar. Kemi bashkëpunim të shkëlqyer dhe s’ka kërkesë nga këto shtete, sepse jemi të gatshëm të nënshkruajmë marrëveshje nëse do të vijnë. S’e di se si i sajoni këto gjëra, në një seancë dedikuar zgjedhësve. Por kur nuk ke zgjedhës i drejtohesh marëveshjeve të ekstradimit.
