Jo vetëm demokratët, por edhe socialistët janë përfshirë nga ethet e zgjedhjeve të brendshme. Në PS do të zgjidhen drejtuesit e degëve të PS-së, proces që duket se po zgjodn debatet, përplasjet por edhe akuzat.
Shkodra është një nga degët më problematike që ka partia e drejtuar nga Kryeministri Edi Rama, i cili ndoshta kishte menduar se duke deleguar ministren e Shtetit për Sipërmarrjen, Edona Bilali, do të shmangte përplasjet. Në fakt Bilali është akuzuar nga një prej kandidatëve, Arbis Vjerdha, të cilin duket se e deleguara e Ramës e ka nxjerrë jashtë garës.
Vjerdha thotë se Bilali ka tentuar ta përjashtojë atë nga gara, duke i rënë ndesh edhe fjalëve të kryeministrit Rama.
“Kam depozituar dokumentacionin e nevojshëm për kryetar të PS, por lufta brenda llojit vijon të jete prezente dhe koordinatorja Bilali duke parë që Arbisi nuk duhet të jetë në planet e saj, vendos kundër propozimit të kryeministrit, që emri im të mos jetë. Ajo në asamble propozon që personat që nuk përfaqsojnë PS në këshillin bashkiak, që i bie të jem vetëm unë, nuk mund të kandidojnë. Kjo tregon nivelin arkaik që ka qeveria jonë me zgjedh një person të tillë që i servir Shkodres për ta drejtuar politikisht.
I bëj thirrje që nëse e do partinë, nëse e do dinjitetin dhe ke respekt për veten, në zgjedhje transparente, me meritokraci, që t’i ofrosh Shkodres një përson që bën ndryshimin. Mos merrni njerëz të mbytur në borxhe për ti bërë drejtora. PS ka nevojë për ndryshim nuk ka nevojë për njerëz që i ndërrojnë perdet. Duhet ndryshuar struktura e kjo nuk bëhet për qëllimet personale të Bilalit. Të hidhet në votim dhe jo të bëhen përjashtime.
Unë nuk merrem me gojët e liga, sepse thonë që drejtoresha e postës, shoqe e ministres, do ta zgjedh kryetare të partie. Janë fjalë dhe jo baza, prandaj unë po them që për mua është vendos mos të jem, ky është fakt.
Unë do të bëj lëvizjet e mia, por i them ministres, se aq vite sa ke ti moshë, unë i kam në parti. Duke protestuar e duke dhënë kontribut”, shprehet ai.
Ndërkohë këta janë kandidatët për kreun e Partisë Socialiste në Shkodër:
Erion Metushi
Hilmi Lakti
Luan Harusha
Mirela Dodaj
Paulin Ndoja
Rudi Sokoli
Valdo Dibra
Vjollca Vuçini
