Nga Boldnews.al
Socialistët e Rilindur nga Edi Rama, të miksuar me 99-at e Erion Veliajt, mbajtën dje Kongresin e tyre.
Një Kongres propagande dhe show në kulmin e një prej krizave më të rënda që prek drejtpërdrejt xhepin e qytetarëve, por edhe kjo u trajtua si një mundësi për sukses.
Në Kongres pati vend për të gjithë ata që komandanti i Rilindjes i donte në podium, përfshi edhe ministret që më shumë prodhojnë meme në rrjetet sociale, sesa bëjnë punë për të cilën paguhen nga taksat e shqiptarëve.
Pati kohë edhe për batutat mes Bled Çuçit dhe Ulsi Manjës, i cili duket se ka nisur një garë me disa nga vajzat dhe gratë e Rilindjes, se kush lartëson më shumë Edi Ramën.
Pati kohë edhe për debatin mes Arben Pëllumbit me Erion Braçen, i cili ndoshta me të drejtë kur sheh se në dorë të kujt ka mbetur PS apo kush mban poste ministrore, nuk di se kujt t’ja nxjerrë inatin e largimit si zv. Kryeministër.
Pati po ashtu panele ku Olta Xhaçka fliste jo si ministre e Jashtme e një vendi të vogël, por sikur përfaqëson një superfuqi. U shfaq edhe Belinda Balluku, e cila foli si meteorologe, ndërsa pak javë më parë u bë objekt barcaletash me këshillat që i jepte qytetarëve për të kursyer.
Foli edhe ministrja Bora Muzhaqi, e cila batutën e rradhës e kishte me diellin e fortë që me siguri na i siguron komandant Edi.
Pra folën të gjithë, përveç Arben Ahmetajt, numrit dy në qeveri, të cilin Rama e ka graduar edhe për Covid, edhe për Rindërtimin, edhe për këtë krizën e fundit të çmimeve.
Ahmetaj konsiderohej si njeriu i afërt i Ramës, i kudondodhur dhe kudogjendur, por që duket se i është kthyer në një minë me sahat.
Dhe shkaku duket se janë inceneratorët. Pavarësisht deklarimeve publike të Kryeministrit se mburret me djegësit, duket se ai ka nisur të “kuptojë” që kjo aferë mund ti fundosë pushetin politik, edhe sikur duart e tij të kenë qëndruar jashtë xhepave të shqiptarëve.
Nëse Rama do e kishte bindje që inceneratorët ishin një projekt që mund të mburrej, ai do e niste Kongresin me Arbenin, do e vazhdonte me Benin dhe do e mbyllte me të njëjtin, Tigrin e Qeverisë.
Madje do ia besonte të gjitha panelet, ku mund të fliste nga shëndetësia, kur dublonte Ogertën në kulmin e pandemisë, për të vijuar me Rindërtimin, pozicion që e shpiku vetëm që fondet të “mirëadministroheshin” nga Beni dhe do e mbyllte me panelin e djegësave, që do të prodhonin energji si një central berthamor.
Ndoshta Rama di diçka më shumë lidhur me të ardhmen e zv.Kryeministrit, në një kohë kur pavarësisht ritmit të hetimeve dhe veprimeve, SPAK ka hapur disa nga petët e byrekut, ku në skenë janë dy nga lidhjet e Tigrit, Klodian Zoto dhe Mirel Mërtiri, të shpallur në kërkim.
Ndoshta e gjitha kjo shpjegon edhe shpërthimin e Edi Ramës ndaj SPAK. Kryeministri mori rolin e një vlerësuesi për punën e SPAK, më pas e trajtoi këtë strukturë sikur ti kishte anëtarë të organizateve socialiste, dhe e përmbylli me mesazhin që ata që presin që t’i mbrojë nga hetimet, duhet të mbrojnë jo vetëm PS, por edhe atë vetë.
Deri më tani, Rama ka “shitur” shumë nga bashkëpunëtorët e tij, deputetë e ministra, kryebashkiakë apo kandidatë, dhe nuk është çudi që i shituri i rradhës te jetë pikërisht numri dy i qeverisë. Në kongresin e PS, duke e mbajtur larg, Rama dha një mesazh publik, që mund të shoqërohet me një largim nga Qeveria të Ahmetajt, ndërsa SPAK-ut i çoi mesazhin që deri në këtë moment të mos bëjë ndonjë veprim të pamenduar.
