Këtë të Premte u prezantua operimi i kompanisë ajrore “WizzAir” në aeroportin e Kukësit, në një event ku ishin të pranishëm dhe ministrja e Infrastukturës si dhe kryeministri.
“Kompania WizzAir ul avionët e saj në aeroportin ndërkombëtar ‘ZAYED – Flatrat e Veriut’, për të nisur në maj operimin e pandërprerë, me 4 destinacionet e para drejt Austrisë, Gjermanisë dhe Zvicrës, fillimisht nga dy herë në javë”, njoftoi Rama.
Ai foli për kursim të qytetarëve shqiptarë, ndërsa shtoi se “ne nuk rrisim çmime”.
“Drejtori i Wizz Air tha një fakt, domethënës dhe kuptimplotë, vetëm nga kjo kompani dhe nga oferta e saj, por në kontekstin e uljes tërësore të peshës së kostove të aeroportit të Tiranës u janë kursyer qytetarëve shqiptarë 120 mln euro dhe llogaria që ne bëjmë pak a shumë në total është dyfishi i kësaj shifre vetëm në bileta, për të gjithë ata që ankohen që ne vetëm rrisim, shtrenjtojmë, ndërkohë që e kundërta është e vërtetë. Sot kemi një vend me barrën më të ulët të taksave në rajon për individët. Qeveria po bën një sforco të jashtëzakonshme për t’i mbrojtur konsumatorët nga rritja e çmimit të energjisë elektrike, gjë që po ndodh në të gjitha vendet”, tha Rama.
